CNTC-i Police Commissioner, councils nem tenüngsang agütsür

Dimapur, Aenjeti/January 23 (TYO): Dimapur Police Commissioner, Rothithu Tetseo-i kanga ilonga yi tamajung ayokba mineral water outlets anema inyakba atema Central Nagaland Tribes Council (CNTC)-i pa nem tenüngsang agütsür, ta Brihostibarnü CNTC Vice President, Khondao Nguliie-i sangdong ka ajanga metetdaktsü.
CNTC-isa Duncan Basti aser IV/LRC densema colony kari tatishitsü tajung sayua item ama outlets nung apuba yi raksa indokba den külemi outlets shibangtsüba atema tenüngsang agütsür, ta metetdaktsü.
“Dimapur jila kübok kiyong aser hihway area aika nung item ama mineral water outlets kanga bulua lapokdar, aser iba ya tsüraburtem aser sensotem atema dang masü saka Arogotem atema-a tebilemtsü tuluka kümogo, kechiyong yi tamajung ayokba ajanga nisung aika taküm lendongi yoker,” ta CNTC sangdong nung shia lir.
“CNTC ya lokti tentet ka lir, anungji tebilemtsü onük balala benoktsü aser awareness agütsütsüji tentet mapa, ajisüaka iba tebilemtsü onük bentettsü atema talisa GBs, Chairmen aser colony councils-i public den longjemer inyaktsüla. Tanü asen Naga nungeri ajangshiba tebilemtsü onük jenti lir, anungji itemji bentettsü atema asalentong yanglua ajaki longjemer inyaktsüla,” ta CNTC-i ayongzük.
“CNTC-i GBs, chairmen aser colony councils den public dang Dimapur ya tang dang nungi tajungba akümtsü atema item ama mapa tamajung atsüdoktsü asoshi tang poliace commissioner den colony council kari inyakba ama inyaktsü mepishia ametetdaktsür,” ta kasa sangdong ajanga metetdaktsü.