CNTC-i president-i jembiba onük pusemer; Lanur aser tetsürtemi kümdanga jembitsü tuyur

Dimapur, March 4 (TYO) : Tawa tu CNTC president Hokiye Yeptho-i osangbener kar den sensaksemdang kechisa jembiogo, item onüktem CNTC-i pusema nungiter aser pai jembibaji ochi lir, ta Media Cell, Central Naga Tribes Council sangdong ka nung metetdaktsü.
Bendanglen nungi aruba osangbenertemi osang belensaba aser mashilen meyipzüka prokshibaji yimya dang. Parnoki külen tsütsü dang repranga osangtem prokshir aser ibaji parnok indang tamaitsü lir, ta CNTC-i ashi.
Maneni, lanurtemi tamasa nenok sobaliba putiotsü aser nenok jakzüka aruba otsü jungjunga meteter ang osangkakettem nung ocettem zülutsü shisalen agütsür, ta Media Cell sangdong nungsa shia lir.
Akhidang nungi asen oboula nungertemi benshia aruba sobaliba aser yimyatsüya metettsü merangang. Tanü lanur aikati tangatetba kecha melii osangkakettem nung lennirtem aser taintem luja aser tila kümja ocettem züluba angur. Anungji iba inyakyim ya pei pei kin hohotemi azüoktsü metetdaktsür, ta CNTC-isa ashi.
Tetsür activist kari parnoki aibelenba aser tensa mejungi kümdaktsüba atema tatok meshitsü melena, Nagaland adena orr – Naga nunger sobaliba aser yimyatsüya memeteter non Naga nunger den senteper maparen tuluba küma inyaktsü meranger, ta parnokisa metetdaktsü.
Bendang linüktem nung non-Naga nunger den kibong kümer alir Naga tsür kari o mebilemdangi jembir aser onük toktsür mashilen jembiba ajanga state nung timtem bener arutsütsü, anungji nenoki iba onük jembiba anenang ta tuyur.
India kübok tanga state tem ama masü, Naga tsürtem tepok nung bena lia raksa meindoker, tanur asüdang kiyii meyoker aser sen yong-a mayoker. Naga tsürtemji wadang ajak nung tebur den kasa jenjang nungdang amshir. Naga tsürtemi election nung toktepnüra tokteptettsü aser tenokdangba kecha mali, anungji parnok nem shilem mekazüka yutsütsü nüngdak madoker, ta CNTC-isa ashi.
Naga tsürtemi loktiliba nung temelenshi bener arunüra, tamasa nenok kidangi meyipa arur mapa inyakang saka bendang linük ka nung jangratema lia nenoki mebilemdangi o jembiba ajanga timtem ang bener arutsütsü. Naga tsürtemji tetemsü tetsürtem lir aser parnok wadang ajak nung shilem mekazüka yur mapa inyaktsü nüngdak madoker, ta CNTC-isa metetdaktsüogo.