CNTC-i RMSA dang nungi tesayur shimba mapa jangjashidaktsüner

Dimapur, Dec. 20 (TYO) : Nagaland nung RMSA kübok tesayur shimba mapa nung metetdaktsüba amato masü saka meshitaki shimba reprangtetter, anungji ibaji jangjashidaktsüner ta Central Nagaland Tribal Council (CNTC)-i RMSA ketdangser dang metetdaktsüogo.
Nagaland nung RMSA kübok tesayur shimtsü asoshi January 27, 2014 nung osang agütsüba nung Naga nunger oshi asem Ao, Lotha aser Sumi oshi nung tesayur mapa atema tazüngba jenjang nüngdakbaji graduate aser class 12 tashi nung pei oshi agiba nisung asütsüla aser Tenyidie atemabo graduate dang masü saka Tenyidie nunga graduate asütsüla ta metetdakja liasü.
Item oshitem sayutsü asoshi tesayur nüngdakbatemji Ao oshi atema tesayur 20, Lotha atema 10, Sumi nunger atema 09 aser Tenyidie atema 21 liasü. Ajisüaka, item rongnung tang shima alibaji Ao nung tatidang agütsür 26 nungi 5 shimtet, Lotha oshi nung tatidang agütsür 14 nungi pezü shimtet aser Sumi nung tatidang agütsür 27 nungi 8 dang shimtet saka Tenyidie nungbo 57 agütsüba nungi 30 shimtet. Aji oda, tanga oshi ajak nung tesayur mapa lemzüktsüba amato masü saka kanga ajema shim saka Tenyidie nungbo 21 dang shimtsü sangdong saka 30 shimtet. Ibaji kechiba yamaji shim-ar metetner ta CNTC-isa metetdaktsü.
Iba dak sendakba maparen nung Nagaland Education Mission Society RMSA-i December 17, 2015 nü makmanüa metetdaktsüba osang ka nung, Ao, Sumi aser Lotha oshi nung tesayur mapa inyaktsü asoshi tatidang agütsürtem rongnung 45% tema angur graduate mali asü ta metetdaktsü.
Ibayongji, tesayur shimtsü asoshi metetdaktsü dangbo class 12 tashi nung ta metetdaktsü saka teshimdangbo graduate junga masüba indang jembir, anungji ibaji jangjashitsütsüla aser ano kong nungi nisung 9 talila bener arua Tenyidie nung shim, ibajia jangjashitsüla ta CNTC lenirtemisa metetdaktsü.
Item inyakyim ajak nungji meshitak angur, anungji iba osang adoker anogo 30 tsüngda RMSA ketdangpurtemi ibaji jangjashitsütsüla. Iba onük nung nübortem ajangzüktsü asoshi tatem tashi nokdaktsü ta CNTC tenüng nung sangdongba osang ka nung tir Wb. Hokiye Yeptho aser tongti zülur Wb. Imtinochet nati metetdaktsüogo.