CNTC-i Senapati Declaration aitsür

Kohima, Rongjui/September 09 (TYO): CNTC-i India sorkar dang ajaki akhümnketa agizüktettsüsa Naga yimtenren ken o latettsü atema süoki ia inyaktsü mepishiba den külemi Luroi/August 23, 2018 nü sangdongba Senapati Declaration aitsür, ta tanü Media Cell, CNTC-i sangdong ka ajanga metetdaktsü.
“Ken o tatembang küma latettsü atema stakeholders ajak den ken o jembiba mapang ka nung iba declaration nung nung aliba amokmerenji ashishir. Stakeholders anema kari tamendakdak makai nüngdak makaba nung amokmerenbaji sashia aitsütsü tetemsü aser temenünütsüka,” ta CNTC-i metetdaktsü.
“Tanga Naga züngsemtem mesüra teloktem dang ‘unmandated’ ‘unauthorized’ ta olong amshibaji CNTC-i ashishir aser linük anemertem ta jaloktsüba aser Naga nunger litsüi maitdaktsütsü atema parnok nokdangbaji ajanga tanga Naga nunger jazüker,” ta parnokisa metetdaktsü.
“Joint Declaration of Senapati ji Manipur nung aliba Naga nunger atema dang süra, ibaji jangjajangja ashitsüla. Mandate meliaka item ama sangdong agutsüba aser tangar dang unmandated mesüra unauthorized ta ajaba atema signatories karbo menütsüogo.
Naga yimtenren onük nung Naga yimtenren telok ajaki amaliteptsü ateme meishiba den külemi iba ken o tekaratiba nung latettsü atema sarasademe ta shia CNTC-i Naga nunger ajak dang tarutsü nungbo nüngdak makaba sangdong magütsütsü mepsihir, ta kasa sangdong nung shia lir.