CNTC-i sorkar dang Nagaland nung terenlok kasasa agütsütsü mepishir

Dimapur, June 18 (TYO): Central Nagaland Tribes Council (CNTC)-i state sorkar dang tejak mereprangi mesüra temulung nung kecha meyui, state ajungalen kasa terenlok mapa inyakang ta mepishia metetdaktsü.
June 17, 2017 nü Tourist Lodge Dimapur nung CNTC executive council-i unit asem – Ao Senden, Sumi Hoho aser Lotha Hoho ketdangpurtem den külem senden ka amen.
Iba senden nung taoba mapang Mokokchung Elakha ta ajaba Mokokchung, Wokha aser Zunheboto district tem dak sendakba onüktem benoka lemsatep, ta Media Cell CNTC-i sangdong ka nung metetdaktsü.
Yaküm kasa tesem nung senden amendang, CNTC kintem nungi sorkar yimsüsürtemi tekaratiba nung inyaktsü ta nangzükba onüktem bilemtettsü atema CNTC-i nenshia metetdaktsü.
Yaküm senden nung jembiba onüktemji- Khelhoshe Polytechnic Asukhuto, Nagaland University Lumami Campus, Foothill Road, Liphayan Governor’s camp nung Doyang bridge, NHIDC-i inyakba Bokajan-Merapani highway aser Tuli Paper Mill tem indang liasü.
CNTC-i yimsüsürtem dang tekaratiba nung item khurettem agizüktsü aser parnoki nangzükba ama nendaka inyaktsü mepishia metetdaktsü.
District asem nung infrastructure tsütsü timtem aliba, ketdangsüba nung metokmeperi, senotsü timtem aser sorkari zübazüba toktsüba onüktem asoshi senden nung adenertemi tribal hoho kübok kuli bushiba teloktem tentettsü aser osang bendentsü atema bangzünga renem, ta Media Cell CNTC sangdong nungsa shia lir.