CNTC-i state sorkar dang ULB elections thinentsü mepishir

Dimapur, January 21 (TYO): Nübortemi adokba ola angashia state sorkari ULB elections thinenang ta Central Nagaland Tribes Council (CNTC)-i tatemsabuba atema temepishiba ka agütsüogo.
January 4, 2017 nü Ao, Lotha aser Sumi nungeri Joint Co-ordination Committee (JCC) tentet aser iba telok ya CNTC-ia pusema nungit. Iba sülen Naga Council Dimapur (NCD) kübok Angami, Chakhesang aser ENPO kintemia JCC nung züngsem. Iba onük asoshi Naga nunger kintem külemi sabang ka nung longjemba atema CNTC tenüngsang agütsür, ta Media Cell, CNTC sangdong ka nung metetdaktsü.
Supreme Court nung ano metembangteti aliba ken o JACWR-i meyipa agitsü aser mangatettep aliba onüktem angatetteptsü mepishir, ta Media Cell sangdong nungsa shia lir.
CNTC-i ULB elections anema masü saka tetsür nem shilem 33 lemzüktsüba anema nokdaker. Iba onük ya nisung ajaki kanga junga shisadanga jembiba sülen ang, ajaki agizüktettsüsa telemtetba tajung ka agitsüla. Anungji, iba nung ajemdaker tetsür nem shilem 33 lemzükja ULB elections agitsüba sentong anema nokdaker, ta parnokisa ashi.
CNTC-i candidate ajak dang elections nung metokteptsü aser tenüng agüja aliba meyipa agitsü metetdaktsüogo. Naga nunger sobaliba aser temeten kümzüka ayutsü tangatetba nung tenüng meyipa agirtem ajak tarutsü pututemi tetshitsü aser bilemtettsü.
State yimtiba Kohima den külemi tanga district kar nung election nung tokteptsüpurtem shinga mali, anungji civil society telok balalai mepishiba agizüka state sorkari iba ULBS elections meyipa reprangshitsü mepishir.
Telok balala tsüngda mangatetteptem liaka, ajak ajungtsü mechi nung telok ajaki atsüanem katepa iba onük tajungtiba nung angatetteptsü atema ayongzüker, ta CNTC-isa metetdaktsü.