Dimapur, Jan. 26 (TYO): Nagaland nung aliba nübortemi state government dang Urban Local Bodies (ULB) election ya magii thitemtsü asoshi mepishiaka, mangar asünungji Dimapur nung mepu aser ward shia nung GBs aser lenirtemi election maparen kecha meinyakdaktsüi nokdangtsüla ta tanü sangdong ka ajanga Central Nagaland Tribes Council ajanga metetdaktsüogo.
Parnokisa candidate shingaia tangalen nungi lanurtem bener arua mamshitsü aser gari nung party flag enoker mesenzütsüla ta metetdaktsüogo.
Joint Co-Ordination Committee-i state government dang khen atema election ya magii atatsü asoshi mepishiba ya mangaika, Nagaland ajunga mokdangtsüsa aküm nungbo mepu shia nung nübortem ajaki JCC den yariteptsüla ta CNTC-isa metetdaktsü.
Tang ya state government-i nübortemi ashi mangai tongpang ayongzüker amai kümogo, anungji nisung ka danga taküm sama nungbo Chief minister T.R.Zeliang aser NPF tir Shurhozelie na den parnok külem yimsüsürtem aser Women Reservation atema inyaker JACWR purtem khuret asütsü ta CNTC-isa metetdaktsü.
ULB election ya magidang tang lateta akaba Municipal Act nung temelenshitsü aliba ya melenshimatsüla, ibaji atema government-i nübortem den maneni shisalemsateptsüla ta Angami Public Organisation (APO)-i metetdaktsüogo.
Ajisüaka, government-i mangar asünungji, koba sentong agi Naga nunger taginüba nokdanger, ibaji anema Naga nungertemi longjemer nokdaktsüla ta APO-isa metetdaktsü.
Nübortemi aginüba ataloktsütsü asoshi governmenti mapang agüja ken o jembitsüla ta APO tir Wb. Vilhusa Seleyi aser tongti zülur, B. Keviselei Lhousa nati metetdaktsüogo.
Ano kasa ULB election dak aketba maparen nung, Naga nungertemi mepishiaka state government-i manger asünungji, Western Sumi kübok aliba yimtsüngtem nungi lanurtem kar danga ULB candidate den senzüa mesüra lia lira pei pei yim goanbura-i meyipa jazüktsüla aser iba ozüng nung aibelenba ajanga timtem lendong langka danga atalokra, iba nisung aser yim nem tapet temerenshi agütsütsü ta Western Sumi Youth Front nung tir Wb.Akihito Sumii metetdaktsüogo.
Western Sumi Hoho kübok aliba area tuku nungi area shia JCC ajanga ayongba mokdangba sentong nung shilem agitsü asoshi nisung 1500 yokang ta paisa metetdaktsü. Sumi nunger ajaki JCC teloki ayongba mokdangba sentong nung shilem agidaktsüner ta WSYF tirisa mepishia metetdaktsü.
Iba telemtetba ya Brehostibar nü Western Sumi Hoho, Western Sumi Kukami Hoho, Western Sumi Youth Front aser Western Sumi Sports Association teloktem telongjem senden ka mena lemtet ta paisa metetdaktsü.
Ano, kasa onük nung NPF Central Women Wing teloki sangdong ka nung yakanü Dimapur nung JCC teloki ayongba lokti senden nung Naga tsür kari Women Reservation anema ayongba senden nung shilem agiba aser NPF lenir aser government nung alir anema taitsüba o jembibaji tejashitsüka lir ta metetdaktsü.
Naga nunger teburtemi pei sobaliba kümzüka yunübaji junger saka ano municipal aser town council nung tetsürtem asoshi menden kar shiteta yutsüba jagi Naga nunger sobaliba meraksar aser linük temzüng arla 371 A nunga mekongshir ta NPF Women Wing-isa metetdaktsü.
Tang lateta akaba ULB election yabo agidaktsütsüla aser mejungra ya ser melenshitsüla saka metendangdangyongibo anema mapusutsüla ta parnokisa mepishia metetdaktsü.
You must be logged in to post a comment Login