CNTC-i WSSU pusemer; R&B minister, department aitsür

Dimapur, July 2 (TYO): Nagaland ajungalen gari lenmang tia mejungi aliba atema Central Nagaland Tribes Council (CNTC)-i tebilemtsü abener ta sangdong ka nung metetdaktsü.
Western Sumi Students Union (WSSU)-i gari lenmangtem tangsatang anepalutsü takhangba agütsüba nung CNTC-ia parnok pusema nungiter, ta Media Cell sangdong ka nung ashi.
Anogo süiba shia gari lenmangtem tamajungba küma aoer, anungji Minister in-charge saksalemtsüla aser iba khuret indang tebilemtsü pai abentsüla. Nagaland nung gari lenmangtem yamai tesenzü mejungibo maliasü, anungji R&B minister-i engineer mesüra contractor tem dak tai metongloktsüi, iba tebilemtsü ya pai abentsüla, ta CNTC-isa metetdaktsü.
Mapa ajak timi aser nendaka inyaktsübaji R&B minister indang tebilemtsü lir. Gari lenmang timbaka kanga mejungi kümogo aser state ajungalen gari lenmangtem nung ongkentem agi süngogo. Gari aser nisungtem mesenzütettsüsa tia ka nung liaka, department aser R&B minister-i iba khuret atema süoki ia mebilemi zübazüba toktsür.
Gari lenmangtem majungba ajanga senzüsenbongertem timtem jenti ajuruba dang masü saka lendongtsüdong balala ataloker, aser nisung takümtem dena laluogo. Anungji, R&B minister den pai aniba department-i senotsü peria manguba agi anepalu mesüteter ta osangkakettem nung tatemzüktsü kuli magütsüi, gari lenmangtem anepalutsüla, ta Media Cell sangdong nungsa shia lir.
Centre sorkari gari lenmang anepalutsü atema senotsü peria agütsüogo aser ibaji nisung ajaki meteta lir. Anungji, R&B minister aser par department-i tebilemtsü khuret abenba sayua, gari lenmangtem anepalutsüla, ta CNTC-isa takhangba agütsü.