CNTC, MTMK & MTYO temi Lunkholal Singson tepsetba aitsür

Dimapur, Metsüremi (March) 21 (TYO): Metsüremi (March) 17, 2018 nü Mukhami yimtsüng nung veterinary field assistant Lunkholal Singson (Alal Singson) tepsetba khukhua aitsür ta Central Nagaland Tribes Council (CNTC)-i metetdaktsü.
Asür Lunkholal ji Abel Awomi aser Pikato Shohe nato tepset ta jangjaogo aser tena dak ozüng tapet agi merenshitsüla, ta Media Cell CNTC-i sangdong ka nung metetdaktsü.
CNTC-isa asür late Lunkholal kinungtsü aser jala den asükhu lemsateper aser iba tejashi aser mangyimba mapang Tsüngremi parnok nem tashi agüjang ta sarasademtsür, ta parnokisa ashi.
Ano külen, Medziphema Town Mechü Krotho (MTMK)-ia sangdong ka ajanga Lunkholal Singson tepsetba khukhua aitsür ta metetdaktsüogo.
Pa ya Sirhima Kuki yimer ka liasü aser iba mapa taochi makaba aser tesempatsü mapa inyakertem ya nisung ajaki aitsütsüla aser ozüng amertemi aibelener ajak tekaratiba nung aputsü mepishir, ta MTMK mendenpurtemi ashi.
Medziphema Town Youth Organisation (MTYO)-ia sangdong ka nung nisung tamajungertemi Zunheboto district nung Lunkholal Singson tepsetba khukhua aitsür ta ashi.
Medziphema sub-division ya nisung temeyoktep aliba tesem ka lir aser onoki loktiliba anema mapa inyakertem aitsür. Asür Lunkholal tepsetertem dak aria mebilemi ozüng tesashi agi merenshitsüla ta MTYO-i sangdong nung shia lir.
Iba tejashi mapang Tsüngremi tasür kinunger nem tesünep agüjang ta sarasademtsür ta MTYO-isa metetdaktsü.