CNTC teloki Assam Rifle mapa aitsür

Dimapur, Oct.27 (TYO): Tan October 23, 2016 nü Wokha district nung Okotso yim anasa Assam Rifles purtemi GPRN/NSCN pur alidak tesem ka amakdang nisung ka khaset aser ka yirutsüba mapaji aitsür, ta tanü sangdong ka ajanga Central Nagaland Tribes Council (CNTC) teloki metetdaktsüogo.
Iba ama tashiyim mapa anema CNTC nung dena aliba Lotha Hoho teloki nokdakba maparen nung CNTC telokia pusema nokdaker aser iba ama nübortem anema inyakba mapang ajemajema melitettsü ta parnokisa metetdaktsü.
Linük nung yimjung aser tesünep alitsü asoshi ajaki “Cease Fire Ground Rules” nung kechi lateta lir, itemji shitak amshitsüla aser Naga nunger linük tenzükertema parnok alitsü lemzüktsüba tesem nung alitsüla ta CNTC telokisa metetdaktsü.
Assam Rifles purtemi tenem nung alir Naga nungertem ya parnok tembartem (Friends of the Hill People) ta jembiba ama, mapa agi sayuteta shitak alitsüla ta parnokisa metetdaktsü.
CNTC telokisa asür kibong den mangyim jashi lemsatepba osang den külemi yirur alisangjia yakta anepjang ta sarasadema metetdaktsü.
Ano, kasa Assam Rifles telokisa October 22 nü Mekokla nung Baptist Arogo tenla ki lapoka yangji parnok tanendak kümer alibaji aitsür ta CNTC telokisa metetdaktsü. Iba ama temeshi tenla ki menenja mezüngmeshiba jagi Naga nunger mulung kanga yirutsüogo ta CNTC-isa metetdaktsü. Parnokisa iba ama tim masüba mapa ya tarutsü nung mataloktsüsa state sorkari India nung sepai aser Cease Fire Monitoring Board den jembitsüla ta metetdaktsüogo.