Coaching agidak reju ka Mokokchung nung yanglutsütsü: Jual Oram

Tongti tesemdanger, Union Minister, Jual Oram aser achichilen noksa nung Tongpang Reju Cultural Club (Tuli) züngsemtemi shilem agiba angur. (Kangtsüng, May 05, 2016).

Mokokchung, May 05 (TYO): Competitive exam balala atema coaching agidak reju ka Mokokchung nung yanglutsütsü ta tanü Union Minister for Tribal Affairs Govt. of India, Jual Oram-i metetdaktsüogo. Pai iba o ya Brihostibarnü Kangtsüng putui ayongzükba 64 buba senso Moatsü benjong sentong ka par yimtak amungdang teimla o ka shiogo.
Tuli paper mill mapa küma moutetba tebilemtsü indang ya oa Central sorkar den jembishinütsü aser iba mapatong atema temulung agütsütsü, ta Jual Oram-isa Tuli paper mill indang tongtibang agüja ashi.
Paisa ashiba agi, tribal ministry ajanga taoba mapanga Nagaland state nem lemzüktsüba senotsü dang nungi taliba agütsüogo, aser tanga mapatong balala asoshi senotsü agütsütsü mulunga aliba indang metetdaktsü. “Nagaland nungi mapatong kechisa arudir, itemji kata mezüdoki reprangtsütsü,” ta paisa shiogo.
Mokokchung Deputy Commissioner, Sushil Kumar Patel (IAS)-i Mokokchung nung competitive exam atema “Coaching Centre” ka lapoktsü tebilemba ka Union Minister dang asüngdangba langzüa ashidang, ‘Iba coaching centre atema tekaratiba nung DPR yanglur yokang,’ ta Jual-isa ashi.
Delhi ama tanga yimti tulu nung nüngdakba aika angur, aji saka, iba ama sobaliba dak sentakba kentenmenü aser yartsüngdangba maparen bulua mangur. Tanü Nagaland aser Assam nungi telok balalai sobaliba yartsüngsangba angudang jangratema bilemer, ta pelaba olen ka metetdaktsü.
Tanü tribal tesemtem nung education luyim tsütsü renloka aoba kuli aika angur, aji saka, asenok rongsenkettsüng tsütsü ano tangar memenep aser rizünga ayuba (saving) tangatetba mali, anungji, iba tsütsü temulung agütsütsü paisa ayongzüka liasü.
Paisa nüburtem dang meratatsü olen ka ashidang, “BJP telok ya Hindu yimsü amanger telok ka ama tsübua mebilemtsüla aser ibai yimsü amanger political party ka masü”, ta jangjashitsü. “Yimsü amanger telok (religion) kati India linük kodanga yimsü mesütet. BJP teloki terenlokji tongtibangba ser maparen ajak inyaker”, ta paisa shisem.
Tang aruba ya zünga pa Mokokchungi anabenbuba arudang, nüburtemi pa dang temeim sayuba aser kanga junga anepaluba asoshi paisa pelaba metetdaktsü.
Sentong nung Parliamentary Secretary Dr. Benjongliba Aier, MLA & Adviser Imtilemba Sangtam, Nagaland BJP tir Visasolie Lhoungu, Nagaland BJP tatong tir Imsü Yaden aser Mokokchung D.C Sushil Kumar Patel (IAS) nungertemia o tatsütsü jembi. Gelekey (Assam), Dongshing Mongnyü cultural club Anaki Phom aser Tongpang Reju cultural club Tuli parnoki sobaliba kenten aser yartsüngsang balala aiba ajanga benjong tobur jungdakja liasü.