Coast Guard-i heroin sen cr 600 alang apu

New Delhi, Monupii/May 21 (Agencies): Indian Coast Guard-i Mongolbarnü Pakistan nunger rong ka nungi heroin asütsü ta temulung melemi bilemba sen crore 600 alang temesepba mozü Gujarat tzüküm nung puogo, ta maritime agency-i ashi.
Rong nung mena alir parnok trok ICG-i puogo, ta kasa sangdong ajanga metetdaktsü.
Directorate of Revenue Intelligence aser tanga agencies tem nungi osang tejangja angazükba sülen meita aoba mapang iba temesepba mozü apu.
Iba inyakyim nung ICG rong ka aser interceptor boats ana amshia liasü.
Bodhbar anepdang Pakistan nunger ango apuba rong Al-Madina ya Jakhau tzüküm nung apu. Iba rong ya jena aotsü merang saka mejenbui puogo, ta kasa sangdong ajanga metetdaktsü.
Rong ya sabangba sülen parnoki temesepba mozü bena aliba yangkhutem tzüyim nung indok tenzük, ta ICG-i ashiba den yangkhu tenet tzü nungi ngutetogo ta ashi.
“Rong bushitsüngdangba sülen temesepba mozü asütsü ta temulung melemi bilemba packet 194 ngutetogo koba chemical analysis ajanga tapet agencies-i asadangshitsü,” ta parnokisa ashi.
Defence PRO Puneet Chadha-i ashiba agi rong nung mena alir parnok trok puogo aser parnok dang Jakhau nung ken o ashishitsü.
“Tang agi taküm tanabenbuba ICG-i Gujarat tzüküm nung heroin aika puogo,” ta agency-i ashi.
March ita ICG aser Anti Terrorist Squad na senteper heroin seret 100 pua liasü.