Coffee ajemba ajanga type 2 diabetes ajemdaktsütsü akok

Anogoshi coffee marok asem nungi pezü tashi ajemba ajanga asen temang nung diabetes tashidak adoktsü aliba lendong nungi kümzüktsü akok, ta scientist temi ashi.
Institute for Scientific Information on Coffee (ISIC) osang ajanga angazükba agi, temang nung diabetes type 2 tashidak adoktsü aliba coffee ajemba ajanga nokdangtsü nung tongtibang shilem ka agir.
Coffee ajemba aser type 2 diabetes tasen bushisüngdangba nung olemtep agitsü atema tawa Germany yimtiba Berlin nung ISIC-i ayongba senden ka nung diabetes tashidak asadangba mongintem aruagi dena liasü.
Senden agiba mapang Karolinska Institute, Sweden nungi Mattias Carlstrom-i, coffee ajemba aser type 2 diabetes tsüngda sendaktep nung tawa-tanü scientist temi bushisüngda aser asadangtetba nung ajemdaker lemsatepa liasü.
Iba senden nung item onük den külemi Mattias-i pa indang meta-analysis tem nung ajemdaker jembi, kong Coffee aser type 2 diabetes dak sendakba aser tajangzük onük 30 bushisüngdanga nung takoktsü lenmang aliba metetdakja liasü. Iba senden nung telok 1, 185,210 shii aruagi denogo.
Iba bushisüngdangba ajanga ashiba agi, anogoshia coffee marok asem nungi pezü tashi ajemba ajanga asen temang nung type 2 diabetes tashidak adoktsü aliba lendongji shilem 25 agi ajemdaktsür.
Type 2 diabetes tashidak ajemdaktsütsü atema ‘caffeinated aser decaffeinated’ coffee naprong ajemba ajanga temang nung iba tashidak nokdangtsü, ta bushisüngdangertemi ashi.