Coldplay kenten sentong nung Bollywood nungi nisung aika adentsü

New Delhi, September 12 (Agencies): Mapang talangka nungi yongya aruba Coldplay kenten sentong Mumbai nung akatsü aser iba sentong nung Bollywood nungi nüngtugu nisung aika adentsü ta osang angazüker.
Kareena Kapoor aser Aamir Khan nati anir Bollywood nisung aika Coldplay kenten sentong nung adentsü jangjaogo.
Ghonda trok sentong nung Ranveer Singh, Katrina Kaif, Shraddha Kapoor, Dia Mirza, Arjun Kapoor, Farhan Akhtar, A R Rahman aser Arijit Singh nungeri International rapper Jay-Z den shilem agitsü.
Kentenertem ajaki angati shilem agir, anungji iba kenten sentong angati dang asütsü, ta Global Poverty Project Co-founder, Hugh Evans-i metetdaktsü.
Coldplay teloki Global Poverty Project den yariteper aser iba asoshi parnok kentener Chris Martin-i küm 15 atema tesentaktep ayutsü nangzüka lir.
Taoba mapang iba kenten sentong indang ticket jenjang dalangtibaji Rs 25,000 aser timtibaji Rs 5 lakh asütsü ta osang prokshi. Iba osang angashia Twitter nung nisungtemi parnok temang nung shilem kar yokdoker ang ticket alitsüsa akümtsü ta asayamenü aser kari jashiba osangtem lemsatep.
Ajisüaka Evan-i ashiba agi, “Ticket angati dang. Media-i tamasa osang tejangja meteter ang twitter nung sangdongtsüla. Chris-i küm 15 tenangzüktep agia lir. Artist ajaki angati dang shilem agitsü.”
July 10, 2016 nü Global Citizen-isa sanitation aser sanitation initiatives nung shilem agiba ajanga ticket angutsü ta metetdaktsü.
Hombarnü Coldplay kentener Chris-ia, “Taruba hopta ishika tsüngda ticket komaser  angutsü ta asüba osang tejangja metettsü. Iba sentong asangsang nung atalokdaktsüba atema nenok tashitait nisungtem dang pelar” ta ashi.
Coldplay-i November 19, 2016 nü India nung shilem agitsü. Iba anogo ya World Toilet Day lir. Iba sentong ya India nung mezüngbuba Global Citizen Concert asütsü aser The Global Education and Leadership Foundation ajanga ayongzüker.