College temi kaketshir tajungtem adokdaktsütsüla

Dimapur, April 5 (TYO): April 5, 2019 nü State College of Teacher Education (SCTE) indang multipurpose hall nung ‘Teachers: Transformational leaders’ ta ser shisatokden sentong ka ayongzüka agi.
Iba sentong ya SCTE Kohima den M. Ed 4th semester aser IQSC külemi yaritepa ayongzük.
Tesayurtem school aser loktiliba nung shilem tajungba agitsü atema iba sentong ayongzük.
Sentong nung Additional Director Dr. Watijungshi-i o jembidang “asen linük nung inyakyim tasentem den research balala ajanga shisaluyimba tsütsü temelenshi tulu nguyonga arudar” ta ashi.
UGC-i college ajak nung ‘quality assessment methodology’ ana benokbaji National Eligibility Test (NET) aser Academic & Administrative Audit (AAA) lir. Iba ajanga Nagaland nung education jenjang tajungba kümdaktsüogo aser state nung quality education agütsürtem SCTE College densemba atema tenüngsang agütsür, ta paisa metetdaktsü.
Nagaland nung sorkar college 15 aser nija college 44 lir aser college ajaki maongkatem kasa angutsüla. College nungi kaketshir tajungtem adokra infrastructure atema tebilemtsü mali. Tanü Nagaland nung shisaluyimba tsütsü tetsürtemiang takok tajungba ngua arudar, ta Dr. Watijungshi-isa shisem.
M.Ed kaketshirtem ya tesayurtem indang tesayurtem lir aser classroom nung dang masü saka loktiliba aser arogo nung lennirtem akümtsü atema tesayurtem melenshidakja sayur, ta paisa metetdaktsü.
Iba sentong nung Faculty In-charge, M.Ed Dr. Bendangyapangla-i tesentepertem pelaa agizüka jembidang “College lapoker küm pungu jungogo aser taküm küm Nagaland University den teti atema züngsemtsü asoshi mapa inyakdar” ta ashi.
Nagaland nung PG course mezüng benokbaji iba college lir aser M.Ed programme ya professional programme ka lir, ta laisa shisem.