Colombia anentsüh nung 13 anenbang

Bogota, Jan 22 (Agencies) : Colombia nung Ecuador den arrtsülen anentsüh nung bus gari tila ka atsüoka luagi nisung ter asem taküm samaogo; parnok rongnungji tanur ana aser tetsür ana densema liasü, ta sorkar osang ka ajanga metetdaktsüogo.
Bus gariji Narino anasa ooya lia iba lendong atalok; iba tesemlen ya tzünglu kanga sashia aruagi mapang shia anentsüh alur ta anagzüker. “Tumaco-Pasto highway nung sorkar bus gari nung ooya alirtem asüba osang angashia ni kanga sasa bilemer; tia maka parnok tuodak nung anentsüh nungzüka alu,” ta Colombian National Road Safety Agency nung director, Alejandro Maya-i Twitter ajanga metetdaktsü. Iba osang zülu tashi nung teyaritepertemi mang ter bo agiteter liasü aser gari lenmang lapoktsü asoshi kol tulu bener aruagi lir ta angazüker.
Bus gariji Tuquerres nungi apuso aser len tom nunga passenger-tem aniketyonga ao anungji, bus nung nisung kwi mena liasüar tejangjabo ashitsü makoker.