Colombia sorkar aser FARC telok nati yimjung tezüngzüktep agiogo

Havana, August 25 (Agencies): Colombia sorkar aser sorkar anemer na tsüngda yimjung tezüngzüktep ka yashi, Bodbar nü agiba ajanga Western Hemisphere nung mapang talangtiba benshiba mangatettepbaren benteta yimji yimjung alitsüsa jenjang bener arutsüogo.
Colombia sorkari sorkar anemer Revolutionary Armed Forces of Colombia (FARC) telok den agiba yimjung tezüngzüktepji Colombia nüburtemi agizük nung dang iba yimjung tezüngzüktep asangsang nung mapa küma benshitsü.
Par nüburtem rong nung FARC telok den agiba yimjung tezüngzüktep agizüktsü mesüra kasaji magizüktsü telemtetba agitsü atema vote bendentsü sentong taküm October ita 2 nü agitsü renema lir.
“Tan Colombia sorkar aser sorkar anemer na tsüngda yimjung tezüngzüktep agiba ajanga telok ana tsüngda tongpang rarabaren anentsü. Ano, tan yimjung tezüngzüktep agiba sülen Colombia nüburtem indang taküm jenjang tajungba akümtsü aser Colombia linük indang otsüsa tasen küma melenshitsü,” ta yashi tezüngzüktep agirtemi sangoktsü.
Colombia sorkar aser sorkar anemer na tsüngda küm 4 shi yimjung senden balala amenba sülen par telok anati tan yimjung tezüngzüktep tatem küma agir lir.
Colombia sorkar aser sorkar anemer na tsüngda tongpang raraba ajanga nisung 220,000 dak tema tepsetba aser nisung million 5 dak temai pei talidak toktsür tanga tesemtem nung jenoka alitsüsa timtem toushi jenti ajuruba osang bushitetogo.
Colombia sorkar aser sorkar anemer na tsüngda yimjung tezüngzüktep agiba sülen par telok ana tsüngda yimjung tezüngzüktep takok ngua agiba atema pelaba olen ka US Tir, Barack Obama-ia Colombia Tir, Juan Manuel Santos den telephone ajanga metetdaktsüogo.