Colombia sorkari yimjung senden amentsü mapang thinener

Bogota, October 28 (Agencies): Colombia sorkari sorkar anemer Marxist National Liberation Army (ELN) telok den yimjung senden amentsü mapang thinenba osang ka par Tir, Juan Manuel Santos-i yashi, Brehostibar nü metetdaktsüogo.
ELN teloki taoba ita 6 tashi tashiyim agi pua ayur Colombia yimsüsür chiokba sülen ang par telok den yimjung senden amentsü renemba osang Santos-i jangjashitsüogo.
Sorkar anema nokdaker tongti telok, FARC den maneni yimjung tezüngzüktep tajungba küma agishitsü merangba mapang ka nung Santos-i aniba Colombia sorkari tan khuret tasen benokshitsüsa tensa ajurur lir.
“Ni ita 1 tejaklen metetdaktsüba ama, Colombia sorkar anema nokdaker telok tulutiba tarensen nung tanabuba, ELN teloki tashiyim agi pua alisang, Odin Sanchez International Committee of the Red Cross nem amoktsüba sülen ang par telok den Ecuador nung yimjung senden amentsü sangoktsür,” ta Santos-i metetdaktsü.
Tan ELN telok den amentsü ayongba yimjung senden mapang thinen aka, par teloki Sanchez chiokra, Colombia sorkari par telok den tan Honibar nü nungi tenzüka yimjung sendenji amentsü mulunga aliba olen ka Santos-isa metetdaktsüogo.
Züngsem 2000 shi zünsemba ELN telok ya US aser European Union nati kiralongrar telok ta züngshiba telok ka lir aser par teloki Colombia sorkar anema küm 52 shi nokdakdang nisung meyirijang jenti tepsetba osang bushiteta lir.