Colombia Tir, Santos nem Nobel Peace Prize agütsüogo

Nobel Committee nung mendenbula, Kaci Kullmann Five-i Norway kübok Oslo yimti nung 2016 Nobel Peace Prize agütsütsü atema Colombia Tir, Juan Manuel Santos shimba osang sangoktsüdang agiba noksa ka yangi angur. (Olso, October 07)

Oslo, October 07 (Agencies): Colombia Tir, Juan Manual Santos nem 2016 Nobel Peace Prize tanü, Hokolbar nü Norwoy kübok Oslo nung agütsüogo.
Colombia sorkar anema küm 50 dak tema nokdaker Marxist telungpurtem den yimjung tezüngzüktep takok ngua agitsü maparen nung tongti shilem agiba nüngtem nung Santos nem Nobel Peace sempetji agütsü.
“Ni iba nungtugu sempet agizüktsü maongka anguba atema kanga pelar. Iba sempet agizükba ya ozü linük aser ozü linük nung tongpang raraba ajanga takoksa ajururtem atema kanga dang tongtipang lir. Ano, tan iba sempet agizükba ajanga ozü Colombia linük nung yimji yimjung teti lidaktsütsü ajungmesor,” ta Santos-i sempet agizükdang metetdaktsü.
Revolutionary Armed Forces of Colombia (FARC) lenisang, Timoleón Jiménez aser pai aniba FARC telok den otsüsütsüsa yimjung tezüngzüktep taoba September ita zülutepa agiba ajanga Santos-i Latin America nung tongpang mapang talangtiba rarabaren  anenja liasü.
FARC telungpur den teti yimjung alitsü mapatong takok ngudaktsütsü nükjidong nung par telok den agiba yimjung tezüngzüktep tan October ita 31 nü tembangba sülena yimjung tezüngzüktepji maneni atsünglangshitsü bilemba olen ka Santos-i tan hopta tetenzüklen metetdaktsüogo.
Colombia sorkar aser FARC telok na tsüngda yimjung mapatong takok ngudaktsütsüren nung United Nations (UN)-ia nungdakba teyari agütsütsü renemba osang ka UN Secretary General, Ba Ki-moon-ia tan Hombar nü metetdakja lir.
Iba tangatetba nung pai par tongti ketdangser, Jean Arnault Cuba yimtiba, Havana-i yoka, Colombia sorkar aser FARC telok na tsüngda agiba yimjung mapatong nung yaritepdaktsüba osanga jangjaogo.