Colonial force anema onoki R-Day nung bomb poktaktsü: ULFA (I)

Guwahati, January 27 (Agencies): Brehostibarnü India linük ajunga nung 68 buba Republic Day benjung amongba mapang Assam aser Manipur nung bomb poka liasü. Assam state tesem balala nung bomb 7 aser Manipur nung 2 apok, saka nisungbo asüba aser yiruba osang ka danga maliasü.
Assam nung aliba telungpur, United Liberation Front of Assam (Independent) telok ajanga iba bomb ya pokdaktsü, ta parnoki metetdaktsüogo.
Delhi nung ‘colonial forces’ aliba anema onoki iba bomb ya pokdaktsü, ta Paresh Barua-i aniba ULFA (I) teloki metetdaktsüogo.
Osanga ajanga ashiba agi, bomb ya Sivasagar district nung asem, Charideo district nung ana aser Tinsukia aser Dibrugarh district nung kaka apok.
Tamalen item telungpur teloki bomb ya nisung aika aliba tesem nung pokdakja lendong tulu adokdakja liasü, saka Brehostibarnü apokba bomb ya aika alu aser nisung maliba tesem nung pokdaktsüba ajanga nisung shinga meyiru.
Assam nung taoba Chief Minister aser Congress lenir tain, Tarun Gogoi-i iba lendong atalokba ajanga CM Sarbananda Sonowal aitsü.
“Upper Assam nung bomb pokdaktsüba ya ni kanga sashia aitsür. Iba ama mapa tamajung inyaker ya tekaratiba nung pua merenshitsü,” ta Sonowal-i Twitter nung züluja lir.
“Iba amala mapa ya nisung ajaki aitsütsüla. Yimjung maginürtemi iba mapa ya inyak,” ta Sonowal-i Guwahati nung Republic Day sentong nung shilem agir, osangbener den jembidang ashi.