Commission-i March 5 lendong atema bushitetba osang state sorkar nem agütsüogo

Dimapur, June 3 (TYO) : March 5, 2015 nü nisung telok kati tashiyim agi tetsür raksatsü ta tai tonglokja alir ka tepsetba tatalokba bushisüngdangtsü atema state sorkari Judicial Inquiry Commission (JIC) ka tentet aser parnoki March 9, 2016 nü bushitetba osang state sorkar nem agütsüogo.

Iba luden nung mendenji taoba Guahati High Court Judge, Justice (Retd) BD Agarwal aser züngsemji (Retd) District Session Judge, Veprasa Nyekha liasü. May 17, 2015 nungi tenzüker ita 10 tashi bushisüngdanga aruba sülen March 9, 2016 nü tenati Nagaland Chief Secretary nem bushitetba osang agütsü saka ita ana süiaka state sorkari iba osang yimjak nung memetetdaktsüi lir.

Chumukedima police complex nung aliba office nung osangbener den sensaksemdang Agarwal-i ashiba agi, Commission-i bushisüngdang asüba osang agütsüogo aser tang bangdak ketdangpurtemi iba onük atema mapa inyaktsü dang anünga lir.

Commission-i agütsüba osang nung ketdangsertemi aibelena inyakba mesüra metongi inyakba kar lira, iba atema bangdakpurtemi dang telemtetba agitsü. Bushisüngdangba mapang Commission-i kija, NGO, NSF, police ketdangsertem aser tangartem dang nungi written statements 47 angu aser osangkaket asem nungia angu. Iba dakji alia sorkar ketdangsertem dang nungi tebang kuli 30 tashi angu, ta paisa metetdaktsü.

Commission-i lendong atalokba nung ajemdaker bushisüngdang asü. Iba indang tebilemtsü khuretji kija mesüra teloki kari abentsü asü mesüra ketdangser mesüra public lennir kari mapa timi meinyakba agi asü mesüra iba lendong ya mataloktsüsa sota yutettsü liasü asü ta onüktem bushisüngdang aser ano tarutsü anogotem nung iba mesükba lendong mataloktsü atema kechi inyaktsüla ta asüba onüktem bushisüngdanga liasü, ta Agarwal-isa metetdaktsü.

Commission-isa state sorkar dang tarutsü nung iba ama lendong mataloktsü atema mapa inyaktsü, prison security akangshitsü aser jail nung CCTV, security alarm, metal detector, monitoring room amala infrastructure alitsü aser riot control equipments ayutsü atema shiogo, ta paisa shisem.

Commission-isa state sorkar dang ketdangsertem training agütsütsü aser Assam nung inyakba ama ozüng alema arurtem puteta anientsü atema National Register of Citizens (NRC) yanglu junger ta shidangogo, ta Agarwal-isa osangbener dang ashi.