Communal party anema raratsü NPF o Congress na lungjemer

Mokokchung, Monupii 23 (TYO): Naga People’s Front (NPF) Mokokchung Division aser District Congress Committee (DCC) Mokokchung ketdangpurtem telungjem senden ka Rasemnü (Bodbarnü) yangi Hotel Metsüben Mokokchung nung menogo. Iba senden nung tongtibangsa tang aruya aliba Lok Sabha bye-election nung telok anaprongla telungjem nung NPF candidate yaritsü asoshi shisa lemsatepa liasü.
Tanü iba senden nung Mokokchung DCC, tir Watimongba Aier-i anir Congress telok nung tashi-takang (veteran-tem) kari shilem agia jembi. NPF Mokokchung division tenüng nung tir Moasangba Jamir aser tongti tezülur Tangit Imsong nati tongti shilem agia liasü.
Tashiyim agi tangar kin kidong anema inyaksangshiba telok koba dang “communal force” ta ajar, iba party den raratsü asoshi aser secular party ka asemtsü nükjidong nung NPF candidate yaritsü ‘high command’ nungi tetuyuba aruba ajanga tanü iba senden ya amentsüsa aküm, ta press conference ka nung iba osangbeneri asüngdangba ka langzüdang Mokokchung DCC lenirtemi metetdaktsü.
BJP ya ‘communal party’ ka ta par inyaksangshiba mapa ajanga jungkai adokogo, anungji, iba (communal forces) anema raratsü asoshi congress den lungjemer, ta NPF Mokokchung Division lenir kati metetdaktsü. Küm 15 tashi NPF-BJP alliance süa aruogo saka tanü iba alliance-ji agiinogo, aji dang masü, NPF-i NDA Govt. yaria aliba den NEDA nung adenba nungia agiinogo, ta paisa jangjashitsü.
PDA sorkar ya BJP tetuyuba nung dang inyaker ta kuli kar ashidang, Nagaland state election agidang NDPP-BJP ya pre-poll alliance liasü aser parnok menden lemsateper (seat 40-20 lemsar) election nung toktep. Anungji, “parnok ya party ka dang lir aser BJP tetuyuba nung dang aor”, ta NPF lenirisa metetdaktsü.
India nung political party rongnung Indian National Congress (INC) ya tejentiba party aser regional party rongnunga NPF ya tejentiba party ka lir, anungji, party tejentiba ana lungjemba ajanga tang aruya aliba bye-election nungji takok angutsü imlar, ta NPF lenirisa ashi.
“Iba telungjem (NPF-Congress) ya kopika aotsü?” ta metetnüa asüngdangdang, “ibajibo tensa mapangi dang bener arutsütsü saka nangzükabo matar”, ta DCC lenirtemi metetdaktsü. “Iba telangzübajibo party higher office nem dang doktsür”, ta NPF division lenir kati metetdaktsü.
NPF-Congress party na lungjemer NPF candidate yaritsü atema asüngdangba ya mezüng NPF tir Dr. Shurhozelie-i ‘congress high command’ dang shiti züluba nungi tenzükba mapa ka lir, ta osang ajanga angazüker.