‘Community Kitchen’ khen anena atar saka koda masürtembo yaritsü

Mokokchung, April 14 (TYO): Mokokchung District administration den külem sür Mokokchung Town Baptist Arogo (MTBA)-i mezüng lockdown tenzükba anogo April 2 nungi April 14, 2020 tashi MTBA tenla kima “Community Kitchen” lapoka koda masür timtemertem nem angati sorochioka chiyungdakja aruogo.
April 14 nü tatemsa chiyungdaktsüba anogo item timtemer nem MTBA-isa nungdakba chiyungtsü kar seper angati lema agütsüogo.
April 2-14 tashi community kitchen lapokba mapang anogoshi koda masür nisung 80-90 tashi angati chiyungdakja liasü, ta osang ajanga angazüker.
Community Kitchen ya mezüngren lockdown atema dang liasü aser ibaji tanü April 14 nü tembanger, anungji, iba mapa khen anena atar, aji saka, koda masürbo ano arogoi maneni yaritsü”, ta MTBA tenzükertemi iba osangbener den jembidang lemsatep.