Confederation 6 nungi 4-i FIFA Tir asoshi Platini pusemtsü

Zurich, July 20 (Agencies): Continental soccer confederation trok nung confederation pezüi FIFA Tir asoshi UEFA tongti Michel Platini pusemtsü, ta Hombar nü osang ka ajanga ashi.
Ajisüaka UEFA Tir asembenren inyaktsü asoshi taküm March ita nung shishisang France nunger Platini-i bo iba election nung tokteptsü asü masü’ar tang tashi nungbo telemtetba agia mali, ta UEFA otongdar kati ashi.
Tang FIFA Tir teinyakdak Sepp Blatter mapatong February 26 nü tembangtsü.
Taoba mapang France linük nungi International football asayar Platini ya par mapang nungbo football asayar mongin rongnung ka liasü ta züngshir aser Deobar aonung Zurich nung confederation züngsemtem den senden aliba mapang pa pusemtsü ta pa dang metetdaktsüogo, ta osang ka ajanga ashi.
“Europe soccer tentet tuluba nung tang teinyakdak lenir asüba yong tang teinyakdak UEFA Tir kanga pelar,” ta UEFA communications tongti Pedro Pinto-i osangbenertem dang ashi.
“Tesüiba anogo ishika Zurich nung pa pusemtsü ta ashibayong pa kanga temulung achir,” ta paisa ashi.
Pinto-isa ashiba agi, tarutsü nung Platini-i pa jenjang shisadangtsü aser pa renema aliba mapang nung pai sangdong agütsütsü.