Confederations Cup atema Russia renema lir

Saint Petersburg, June 17 (Agencies): 2018 World Cup atema tetendangba ka ama Honibarnü nungi Russia nung ‘hooliganism’ aser ‘security’ dak sendakba nung tebilemtsü liaka Confederations Cup tenzüktsü.
Iba asayamong nung World Cup akoker Germany telok densema telok 6-i shilem agitsü aser iba ajanga asaya reprangtsüpurtem aika yimti nung senteptsü, anungji Russia nunger atema item raliwalirtem aser lisopurtem azüoktsüba nung parnok tashi tendangba mapang ka asütsü.
Taruba küm World Cup yimti 11 nung stadium 12 nung asayatsü aser ietm yimti tem rongnung Moscow, St. Petersburg, Kazan aser Sochi densema lir.
Honibarnü Group A mezüngbuba asaya Russia aser Oceania champions New Zealand na tsüngda Saint Petersburg, Krestovsky Stadium nung asayaba mapang President Vladimir Putin arua adentsü.
Krestovsky Stadium asüba nung mepetmesü aika adokogo aser item taitsüba aser mepetmesü liaka küm 10 shi agia iba stadium ya yangluogo. Iba stadium ya yanglutsü asoshi sen $800 indoktsü ta asateta liasü.
Yaküm iba ground tendanga asayaba nung raksaadok aser iba melena tang aritepa pitch tasen ka yangluogo, saka sentong ayongertemi ashiba agi, iba ground ya asayatsü asoshi temsüa lir.
“Onok iba asayamong atema renema lir. Infrastructure, hotel, transportation system ajak renema lir aser iba asyamong mapang kecha lendong matalokdaktsütsü asoshi kanga junga renema lir. Russia-i nenok pelashishia jaoker,” ta Russia deputy Prime Minister Vitaly Mutko-i ashi.
FIFA Secretary General Fatma Samoura-i ashiba agi, parnoki imlaba dang nung tali Russia nunger renemshir lir.
“Onoki Moscow aser St Petersburg stadium semdangogo aser parnok kanga junga renema lir aser asayamong tajung rongnung iba ya ka asütsü ta imlaa atati,” ta FIFA ketdangseri ashi.
Groupe A nung tanga team anaji Cristiano Ronaldo-i anir European champions Portugal aser CONCACAF team Mexico ta alitsü.
Groupe B nung Germany, Asian Cup champion Australia den asayatsü aser Africa Cup of Nations winners Cameroon o Copa America champion Chile na asayatsü.