Cong-i linük ainba nokdanger: Naidu

Chennai, August 09 (Agencies): Parliament House anaprong nung opposition temi ochimashi ken o nung densema aliba BJP minister tem parnok menden nungi aludaktsütsüla, ta takhangba agütsüba ajanga joko anogo aika senden makateti arudagi, aser iba dak sentakba nung tanü Deobar nü BJP lenir aser Parliamentary affairs minister M Venkaiah Naidu-i, opposition party ka ama Congress-i shilem tajung agitsüla ser nung parnoki linük renlokba maparen ang nokdanger, ta aitsüogo.
“Tashi nung aliba mapang parnoki (Congress) terenlok mapa sentok, aser tang opposition nung aliba mapang nunga parnoki rongsenkettsüng ainba nokdanger, ta tangbo nüburtemi rajema arur,” ta Naidu-i Chennai nung osangbenertem dang ashi.
“Parnok tashi nung aliba mapang parnoki India langtsüleni ludaktsü, tang parnok opposition nung lir asünungji parnoki India tejakleni modaktsüner,” ta BJP lenir Naidu-i ashi.
Pai ashiba agi, Narendra Modi’er sorkar kanga nüngtugu akümba ajanga Congress aser par teloktep party tem mepelar.
Naidu-isa, Parliament nung Goods and Services Tax (GST) Bill agizüktsüji kanga tongtibang, kechiyong ibaji ajanga linük ya market ka dang kümdaktsütsü, ta ashi.
Paisa, state kar dak alaka ajaki aser yimtenren party ajaki GST Bill agizükdaktsüner, ta ashi.
GST Bill nokdangba ajanga linük nübur melung yirutsütsü, ta paisa shisem.
Senden tenzükba anogo nungi Congress-i taoba mapang IPL mendenbuba Lalit Modi yariba ken o nung External Affairs Minister Sushma Swaraj aser Rajasthan Chief Minister Vasundhara Raje na aser Vyapam ochimashi ken o nung Shivraj Singh Chouhan nunger menden nungi aludaktsütsüla ta akhanger.
Parliament House anaprong nung rongrong adoka senden magitetba ajanga July 21 nü senden tenzükaka tanü tashi Land Acquisition Bill aser Goods & Services Tax (GST) Bill densema Bill ka danga magizüki arudagi.