Cong-i linük merenlokdaktsüner: Naidu

Varanasi, September 01 (Agencies): Congress Party aija tanü Union Minister Venkaiah Naidu-i, “Parliament nung tongtibang bill tem agizüktsü nung Congress-i tettsükdaktsü bener arutsür, kechiyong iba party-i linük nung terenlok mapa mereprangner,” ta ashi.

Union Minister-isa, “Kobi melii BJP-i item ajakji parnok matsüngdang jungkai adoktsütsü, parnoki linük nung aluyimertem anisabaji jungkai adoktsütsü,” ta ashi.

“Ozü sorkari linük nung aluyimertem jenjang ajungkettsüner aser NDA sorkari benokba Land Bill ji khenyongi aluyimtertem ajangzüktsü asoshi liasü,” ta pai ashi.

“Ano GST ya-a kanga tongtibang bill ka lir. Linük kara aintsü atema iba bill ya agizüktsü nüngdaker, saka linük merenlokdaktsütsü atema Congress-i iba bill ya Parliament nung magizükdaktsüner,” ta Union Minister-isa aitsü.

Tanü Naidu-i Varanasi nung Governments Girls Inter College nung “Swachh-Bharat, Swachh Vidyalaya National Campaign” programme kübok ‘Sanitation & Water Purification Facilities’ lapokja liasü.