Cong-i lungkak aita minister VK Singh dang tatok meshitsü akhang

New Delhi, Dec. 02 (Agencies): Bodhbar nü Lok Sabha senden nung Congress züngsemtemi Union minister, V K Singh dang tatok meshitsü akhangba den külemi Ato kilonser, Narendra Modi dang pai Union minister koma merenshitsü sentong lir (?), ta asüngdang.

Taküm dalit tanur ana mi agi rongseta südaktsüba dak sentakba nung jembidang Union Minister VK Singh-i tanur anaji azü den medemdanga jembiba sülen aikati iba oji ashishia liasü.

Tanep senden tenzükli Congress züngsemtem tejakleni oa yimyim ayimba mapang Parliamentary affairs minister, M Venkaiah Naidu-i,Tamil Nadu aser Andhra Pradesh na nung tzünglu aser tzümetsüng indang tama süoka jembitsüla, ta benok.

Paisa, state sorkari tajungtiba nung inyakdagi aser Parliament-ia state nüburtem nungiter ta metetdaktsütsüla. “Chennai nung tzü tekong tashi atur…navy yokogo… tang tensa mejungi lir. Asenoki tongtibang onüktem tama lemteptsüla,” ta ashi.

Ajisüaka Congress züngsemtemi maneni Singh-i tatok meshitsüla ta takhangba agüja yimyim ayim. Lok Sabha nung Congress lenir, Mallikarjun Kharge-i, Singh-i jembiba o atema Ato kilonseri kechi temerenshi agütsütsü sentong lir, ta asüngdang. Iba mapang nung Ao kilonser Modi-a senden nung mena liasü.

Congress züngsemtemi Question Hour piyong lungkak aita liasü.

Lok Sabha Speaker Sumitra Mahajan-i, linük nung akhümtsübutep maliba onük yashi anogo piyong jembiogo aser Home Minister-ia telangzüba tejangja agütsüogo, anungji pei pei mendeni oa menang ta lai maneni Congress züngsemtem dang mepishi.

Taküm Haryana nung aliba yimtsüng ka nung tanur ana tepsetba dak sentakba nung jembidang taoba mapang Army tongti aser tang Union minister Singh-i, “local tatalokbatemji kodanga Centre sorkar den mesentakteptsüla. Bushisüngdang kadagi. Nisung kari azü dak lung agi aonba ajakji sorkar khuret masü,” ta jembia liasü.

Congress züngsemtemi Union minister menden nungi agientsüla ta akhangba mapang Ato kilonser Narendra Modi Lok Sabha senden nungi tejak mekümer ayazüka ao.