Cong-i NE nung Centre mapatongtem aitsür

Shillong, July 15 (Agencies): AICC general secretary V. Narayanasamy-i anogo ananü Meghalaya semdangba mapang Centre nung BJP-i aniba sorkari Northeast anemba mapatongtem benoker, ta aitsüogo.
Mongolbar nü Shillong osangbenertem den jembidang Assam dak alaka NE state tem nung party incharge Narayanasamy-i, Lok Sabha election mapang nung Modi’er sorkari tesem (NE) nung aliba nüburtem dang aika nangzükogo saka tashii aruba sülenbo parnoki itemji sentokogo, ta aitsü.
NE state tem nem maongka balaka agüja aliba agienba aser Centre-i teyari agütsüba scheme tem nung senotsü ajemtsüba asoshi pai Centre sorkar aitsüogo.
Congress-i yimsüsüba state tem nung NDA sorkari jangjonger ta aija Narayanasamy-i, “Maongka balaka agienba ajanga tesem nung terenlok mapatong aika nung tetsükdaktsü bener arutsüogo. Ita asem tejaklen tesem nung chief minister temi Ato kilonser den senden amentsü asüngdang saka Ato kilonseri ibaji kodanga magizük mesüra tesem nung tensa reprangshimtsü aser iba maongka tanaben agütsütsü telemtetba magi,” ta ashi.
Mapang shia NDA minister temi tesem semdangba ajanga tajung kecha madok, kechiyong tashi ajakji Ato kilonseri amshir, ta Congress lenirisa aitsüogo.