Cong-i Punjab lanurtemji kiralongrartem aser mozü-chirtem ta ajar: PM Modi

Kotkapura, January 29 (Agencies): Congress Party aija tanü Ato kilonser, Narendra Modi-i, Congress-i Punjab lanurtemji kiralongrartem lir ta ashir, ibaji kodaser agizüktettsü, ta asüngdang.
Kotkapura nung Punjab assembly election atema BJP nüboyim lokti senden ka nung jembidang Modi-i, “Congress-i state lanurtemji kiralongrartem lir ta ashir. Kari parnokji mozü achirtem lir ta ashir. Ibaji kodaser agizüktettsü?,” ta asüngdang.
Pakistan-a aija Ato kilonser Modi-i, “Punjab-i Pakistan den arrtsü lemsateper; security atema aser nüburtem kümzüka alitsü atema inyakteter sorkar ka state-i nüngdaker,” ta ashi.
Punjab Chief Minister Badal tenüngsanga Ato kilonser, “Nisung kari Badal Sahab aija jembir; lenir tajung ka anema yamaji jembibaji tagizüktetla masü,” ta ashi.
Modi-i ashiba agi, pai aluyimertem azükarua lidaktsüner, iba yongji sorkari Pradhan Mantri Krishi Sinchai Yojana densema mera aika agia inyakogo.
Punjab nung assembly menden 117 atema February 4 nü election agitsü aser iba election nung tongti tetokteper party temji state sorkar tashi nung aliba Akali Dal-BJP teloktep, Congress aser Aam Aadmi Party (AAP) lir.