Cong-i Rahul Gandhi bendanglen senden nung adenba noksa saya

Aspen (US), September 28, 2015: Congress tatong Tir, Rahul Gandhi Aspen (US) nung senden ka nung adenba noksa nung angur. BJP-i Rahul Gandhi US nung sodi mongdar ta aitsüba mapang ka nung tanü Congress tatong Tir Rahul’er office ajanga iba noksa ya twitter ajanga sayaogo.

New Delhi, September 28 (Agencies): Congress tatong Tir, Rahul Gandhi linük toktsür aoba atema taitsüba olen balala jembiba tebang nembangtsütsü atema Congress tatong Tir office-i par lenir Rahul Gandhi Aspen nung senden ka nung adenba noksa ka tanü twitter ajanga sayaogo.

Congress tatong Tir office-i twitter nung Rahul Gandhi noksa den külemi, “Aspen nung alima rongsenkettsüng aser technology disruptive power nung onük tongtibangtem nung o lemtepdar,” ta lemsatep.

Rahul Gandhi Colorado nung ‘New Media and International Affairs Conference’ nung dendar ta mamangtetertem olulu mejembidaktsütsü nükjidong nung Congress office-i iba noksa sayaogo.

Congress office dak alia Congress lenir Milind Deora-ia Rahul Gandhi indang noksa kar sayaogo.

Tesüiba anogo ishika Rahul Gandhi linük nung maliba atema olulu balala jembia mangatetetp adoka liasü.

Congress-i, Rahul senden ka nung adentsü atema Aspen (US)-i ogo ta metetdakja liasü.

Party-isa, pai maneni Bihar assembly election nüboyim sentong anitsü, ta shiogo.

Taoba Mongolbar nü Congress tatong Tir United States-i apusoa liasü, aser iba aonungjisa Congress otongdar Randeep Surjewala-i, “Congress tatong Tir Rahul Gandhi senden ka nung adentsü atema Aspen, US-i aor. Iba senden nungji alima tesem balala nungi nija aser sorkar lenirtem adentsü imlar,” ta metetdakja liasü.

Ato kilonser Narendra Modi UN General Assembly nung adentsü atema New York-i aotsü aliba mapang ka nung Rahul Gandhi US-i oa liasü.