Congress asentenshitsü meranger

Amungnü (Deobar) nikongdang Congress indang 84 buba plenary session tembang aser iba mapang Congress tir Rahul Gandhi-i Bharatiya Janata Party (BJP) anema o aika jembia liasü. BJP-i rongsenkettsüng tim mesüi ketdangsüba, lokti nung nübortem putepa melitettsüsa tensa adokdaktsüba aser ochimashi mapa inyakba onüktem nung ajemdaker Rahul-i o jembi. Paisa, taoba United Progressive Alliance (UPA) sorkari nübortem taginübatem metongtsütetba atema sasa bilemba aser Congress nung lennir aser züngsem tsüngda jara tulu ka aliba indang onüktem jembisema liasü aser idangji pai jaraji endoktsü ta tenangzükba agi. Küm 132 tain Congress putiotsü nung tanü parnok jenjang tamajungtiba ka nung aliba mapang ka nung iba plenary session ayonga agi. Tang Congress-i state asem nung dang sorkar tashi bena lir aser Lok Sabha nung menden 50 teküpok nungang parnok mena lir. Taküm Gujarat assembly election nung menden aika nung takok anguba aser Rajasthan nung by-election nung takok anguba den Uttar Pradesh nung BJP tashi mait akümer ama ajitetba agi Congress tasü itshir ama bilemer. Ajisüaka, itemji ajanga party ka inyaksangshi nung tashi mait alibatem miimbanga meyutettsü. Tan plenary session nung Congress-i 2019  general election dak rangloker onüktem jembiogo. Rahul aser tetsü Sonia Gandhi nati jembiba onüktem den yimtenren aser rongsenkettsüng atema bangzüng renemba ajak agi Congress-i 2019 atema sentong renemba sayur. Parnok atema tongtipang teinyaktsüji tanga political party tem den teloktep tajung yanglutsü asütsü ta Congress ketdangpurtemi metetdaktsüogo. Congress-i parnok dak aliba metokmeperitem ajitetogo aser BJP anema vote agütsübatem senzüka meyoktsü atema lennisüba meraktepi parnoki tanga teloktem den tesentaktep ayutsü mulunga lir ta tan plenary session nung parnoki bangzüng ka agiogo. 2019 general election atema Congress-i nüboyimba mapang linük indaktsütsü, mapatem adokdaktsütsü aser nübortem yaritsü tenangzükbatem agitsü ta parnokisa metetdaktsüogo.  Modi sorkari ‘anogo tajungtem’ bentsür arutsü ta nangzükba nung tamakok nguogo ta Congress-i bilemer aser iba jagi parnoki linük nung tongtipangba telemsa ana- aluyimertem aser lanurtem dak rangloker mapa inyaktsü ta plenary nungsa telemtetba agia liasü. Ajisüaka, ajak dang tongtipangji Congress sasep nung temelenshitsü aika lir aser parnok ketdangsübaren nung tashi itshitsüla. Lennirtemi Congress züngsemtem ajungmesotsüla kechiyong tongtipang state tem nung parnok pusemer aika mali kümogo, anungji parnoki item state nung nübortem atsür arutsü atema kechi inyaktsü nangzüktsü ta asübaji kanga tongtipang lir. Lennisüba tsütsü medemdangra Rahul Gandhi-i Narendra Modi memeneptsü aser iba jagi pai kanga merangtsü nüngdaker. Hao, taküm plenary session ajanga Congress-i tongpang nung noktaktsü renemogo saka iba tongpangji mapang talangka agitsü aser tasak asütsü. Küm 132 tain Congress party-i küm tenet sülen “Temelenshiji tang lir” omen nung iba plenary session ayonga agiogo. Iba session agiba sülen Rahul Gandhi-i koba tashi ka nung pai aniba telok len anir aotsü aser temelenshi bener aruteter ta nübortemi tenük yoka reprangtsü. Atangji, mapang ka India linük nung kanga dang wangwangshia aliba party ka tanü teküpokba jenjangi lua tenüng mali kümogo. Anungji iba party shia arutsü aser asentenshitsüji kanga tasak asütsü aser mapang talangka agitsü.