Congress aser JD(S) na miim tezüngzüktep ka lir: PM Modi

Tumakuru (Karnataka), Monupii/May 05 (Agencies): Karnataka Assembly election atema Congress aser JD(S) nati miim tezüngzüktep ka agiogo, ta shia tanü Ato kilonser, Narendra Modi-i, H D Deve Gowda’er party-i Congress party kümzüka liasü, ta ashi.
Karnataka kübok Tumakuru nung election nüboyim sentong ka nung jembidang Modi-i, Congress-i vote angutsü atema küm aika linük nung sensak tia malitsü atema jembia aruogo saka parnoki aluyimertem aser sensakertem sendoka aru, ta aitsü.
“Election survey balala aser yimtenren metetertem ajaki JD(S)-i Congress tamakok mengudaktsütettsü ta jembir. Parnoki sorkar mekümtettsü ta jembir. Karnataka nung BJP-i dang temelenshi bener arutsütettsü,” ta pai ashi.
“Kari Congress kümzüker süra, ibaji JD(S) lir. Congress aser JD(S) nati miim tezüngzüktep ka agiogo,” ta Modi-i ashi.
Modi-isa, Congress-i parnoki JD(S) den tangatettep kati arur asü maru, ibaji ashitsüla; Deve Gowda’er party teyari ajanga Bengaluru nung Congress nungi mayor akum, ta ashi.
“Kechiba nenoki ya miimshir? Congress Party-i tasü itta nüburtem dang ochi metetdaktsütsüla,” ta Modi-isa ashi.
Ajisüaka Modi-i, pai Deve Gowda akhümtsübur ta ashi. 2014 küm Lok Sabha election mapang nung Deve Gowda-i, Modi Ato kilonser kümra pa soseta asütsü, ta jembia liasü.
Modi-i, Deve Gowda-i pa anema nokdakaka pa Karnataka-i aruba mapang nung pai Gowda 100 tashi arishia alitsüla aser lokti tenzüktsüla, ta shiogo, ta metetdaktsü.
Anogo ana tejaklen Bengaluru nung nüboyim sentong ka nung jembidang Modi-i nüburtem dang Deve Gowda’er party nem vote magutsütsüla, kechiyong parnoki election nung tasembuba jenjang ang angutsü, ta jembia liasü.
Modi-isa, Congress party nungi kibong kati dang küm aika linük yimsüsüa aru, aser parnoki sensaker aser aluyimertem sendoker, ta aitsü.