Congress aser NCP anogotem züngdangteta lir

Shillong (Meghalaya), October 04 (Agencies): Food & Consumer Affairs Union Minister, Ram Vilas Paswan-i, China-i Brahmaputra nung yimokba ayong ka nokdangba atema Ato kilonser, Narendra Modi-i tanga lenmang ka bushidar, ta metetdaktsü.
Shillong nung aliba Hotel Pinewood nung Hindi Salahkar senden mapang nung osangbenertem den jembidang Paswan-i, “Centre sorkari iba tensaji meteta lir aser iba atema inyakdar,” ta ashi.
Tawa kiralongrartemi Jammu & Kashmir, Uri nung army camp amakba sülen India-i Pakistan den tezüngzüktep agia aliba, Indus Water Treaty agientsü atema o lemtepba mapang ka nung China-i Brahmaputra nung yimokba ayong nokdanger.
India-i Indus Waters Treaty reprangshiba sülen anogo ishika tsüngda China-i sangdong ka ajanga, Tibet nung hydropower projects amenoktsü asoshi parnoki Brahmaputra nung yimokba ayong ka nokdanger, ta metetdakja liasü.
Tang tashi nungbo China-i, onok indang tzünokdang ajanga India tsütsüleni tzü ayimba nung mekongshir, ta shiogo.
2016 Assam Assembly election nung iba ya BJP atema tongtibang onük ka liasü.
Union Minister-isa, “Iba tebilemtsüji Ato kilonser aser sorkar nem tokjang. Onoki lenmang ka bushitsü,” ta ashi.
Tawa kiralongrartemi Baramulla amakba dak sentakba nung Paswan-i, ibaji India-i LoC nung kiralongrartem amakba ajanga Pakistan-i par tejashi sayuba dang lir, ta ashi.
Paswan-isa, “Linük nung National Congress Party (NCP) aser Congress anogotem züngdangteta lir, aser tarutsü nung Meghalaya ji BJP-i aniba NDA shilem ka akümtsü,” ta ashi.
“Manipur nungbo onok Lok Janshakti Party (LJP) MLA ka lir. Ano külen Assam nung BJP-i aniba sorkar lir,” ta paisa ashi.