Congress aser NCP MLA temi Shiv Sena den jembidar: Sanjay Raut

New Delhi, October 31 (Agencies): Maharashtra nung sorkar akümtsü atema Shiv Sena aser BJP na tsüngda obangmapu aliba mapang ka nung Brihostibanü Shiv Sena lenir aser Rajya Sabha MP, Sanjay Raut-i, sorkar akümtsü atema Congress aser NCP densema tanga party tem nungi MLA temi Shiv Sena den tongtepratepdar, ta metetdaktsü.
Ano külen tang tasen shimba MLA tem senden amendang Shiv Sena tongti, Uddhav Thackeray-i, party züngsemtemi olulu nung mamangtsüla, ta shiogo.
Uddhav-i ashiba agi, tanga party shingaia Shiv Sena den official süa mejembir saka osangkakettem ajanga osang balala agütsüdar, ta ashi.
Uddhav-isa, Union Home Minister aser BJP Tir Amit Shah nati state nung 50-50 inyakyim nangzüka aliba ama inyaktsüla, kechiyong Lok Sabha election jakdang Shah-i iba inyakyim atema nangzüka lir, ta ashi.
Shiv Sena tongtiisa Maharashtra Chief Minister Devendra Fadnavis-i Diwali mapang osangbenertem den jembiba aija, Diwali mapang Fadnavis-i jembiba o nung ajemdaker Shiv Sena aser BJP na tsüngda senden amenba anen, ta ashi.
Tanep Shiv Sena-i legislative party lenir atema Eknath Shinde shimogo. Shinde ya tang Maharashtra sorkar nung PWD Minister lir aser Kopri-Pachpakhadi constituency nungi MLA lir.
Shiv Sena-i BJP dang küm 5 ji sadanger party anaprong nungi Chief Minister inyaktsü akhanger, ajisüaka BJP-i Shiv Sena nem Deputy Chief Minister menden ang agütsüner.