Congress aser Pakistan napronglai PM Modi agienner: Sambit Patra

New Delhi, Rongjui/September 24 (Agencies): Congress Party aija tanü Bharatiya Janata Party (BJP) otongdar, Sambit Patra-i, Congress aser Pakistan na tejashibaji kasa; Congress aser Pakistan naprongla nükjidongji India yimtenren nungi Ato kilonser Narendra Modi agientsü atema lir, ta ashi.
Patra-i, “Congress aser Pakistan na taginübaji kechi? Tenaprong tejashibaji kasa aser India yimtenren nungi Modi agientsüji parnok nükjidong,” ta ashi.
BJP National Tir, Amit Shah-i Congress Tir, Rahul Gandhi aija, nai Pakistan den International teloktep ka yanglu asü? ta asüngdangba sülen anogo asem sülen maneni Patra-ia Congress aitsür.
Taoba hopta Shah-i Rahul dang, nai Pakistan den teloktep yanglua ali asü, kechiyong anapronglai ‘Modi agienang’ ta yimyim kasa ayimer, ta aija liasü.
Shah-i twitter ajanga, “Rahul Gandhi-i ‘Modi agienang’ ta jembir. Pakistan-i ‘Modi agienang ‘ ta jembir. Tangbo Pakistan-ia Rahul Gandhi-i tamendakdak makai Ato kilonser Modi aitsüba pusemer. Congress-i Pakistan den International teloktep ka yanglur asü?” ta asüngdanga liasü.
Tang India aser France na tsüngda Rafale fighter aircraft atema tezüngzüktep agiba ken o nung BJP aser Congress na kanga aitsütepa arudar.
Taoba France Tir, Francois Hollande-i Rafale deal ken o nung sangdong ka metetdaktsüba ajanga tang linük yimtenren anokshidar.
Hollande-i, Dassault Aviation nem maongka magütsü, saka Rafale fighter contract atema Anil Ambani-i aniba Reliance Defence den külemi inyaktsüsa akum, ta sangdonga liasü.
Paisa, India sorkari iba contract atema Reliance tenüng benok, anungji Dassault-i parnok den külemi inyaktsüsa akum, ta ashi.
Taoba France Tiri sangdong agutsüba nungji ajemdaker Congress party-i tang tesashiba sorkar aitsüdar.