Congress aser sorkar napronglai tekong merangteper

New Delhi, August 01 (Agencies): Parliament senden junga magiteti aliba tensa ya tang-tangbo tajungba makümtsü südi, kechiyong Hombar nü Party ajak senden ayongzüka liaka tanü sorkar aser Congress naprongla tekong merangtepa jembiogo.
Hombar nü Party ajak senden nungji BJP lenirtem nem temerenshi agütsütsü onüka süoka jembitsüla ta Congress-i shiogo sasa sorkari aji oda masütsüa akok.
Tamalen jembia aliba nungi masetshii Union Minister Ravi Shankar Prasad-i, External Affairs Minister Sushma Swaraj-i sangdong ka agütsütsü renema lir, aser state onüktembo Parliament nung benoka mejembitettsü, ta ashi.
Opposition party tongti Congress-i Lali Modi mangatettep ken o nung ajemdaker External Affairs Minister Swaraj aser Rajasthan Chief Minister Vasundhara Raje na minister menden nungi atsüngdaktsütsüla ta akhanger, aser Madhya Pradesh nung Vyapam ochimashi ken o nung state chief minister Shivraj Singh Chouhan-i menden nungi alutsüla, ta akhanger.
Tanü New Delhi nung osangbenertem den jembidang Prasad-i, “Mezüng anogo (Parliament senden) nungi Sushma-i sangdong ka agütsütsü renema liasü. Ano Vyapam ken o dak sentakba nung, Congress-ibo amatoker alitsüa akok, saka state onüktembo Parliament nung süoka o melemteper,” ta ashi.
BJP osangtem ajanga ashiba agi, senden junga magiteti aliba tensa ya tatembang kati arutsü atema sorkari akokba tashi agi merangogo, aser Ato kilonser Narendra Modi-ia opposition lenirtem den jembiogo.
Rajya Sabha nung opposition lenir Ghulam Nabi Azad-i, party ajak sendenji Swaraj, Raje aser Chouhan nunger anema kcehi temerenshi agütsür, iba nungji ajemdaker agitsü, ta jembiba sülen anogo ka lir tanü Prasad-i item o jembiogo.
Senden nung tongtibang bill tem Congress-i agizükner ta shia Azad-i, “Iba onük (BJP lenir asem) ya o lemteptsü onük rongnung adentsüla,” ta ashi.
Lalit Modi aser Vyapam ochimashi ken o nung Union Minister Swaraj den state chief minsster ana minister menden nungi aludaktsütsüla ta Congress-i anir opposition temi akhangba ajanga tesüiba hopta ana tashi senden junga magiteti arudagi.
Yashi Congress-i jangja-jangja dang, party-i party ajak senden nung shilem agitsüji opposition-i akhangbatem nung Ato kilonseri inyakba dak keta lir, ta metetdaktsüogo.