Congress aser tangartemi party ajak senden nung maden

New Delhi, June 19 (Agencies): Lok Sabha aser state assemblies election külemi dang agitsü onük nung Congress densema opposition party aikati Bodhbarnü Ato kilonser, Narendra Modi-i ayongba ‘one nation, one election’ senden nung maden.
Iba senden nung Congress den NDA teloktep nung dena aliba party Shiv Sena, Samajwadi Party (SP), Bahujan Samaj Party (BSP), DMK, Telugu Desam Party (TDP) aser TMC party temi maden.
CPI(M) general secretary, Sitaram Yechury aser CPI lenir, D Raja nabo iba senden nung aden, saka iba onük nung tenati ai-aura maka.
Parliament aser state Assemblies election külemi agitsüji federal, democratic aser linük temzüng alema lir, ta Yechury-i ashi.
Bodhbar anepdang Congress-i iba onük nung o lemteptsü atema tanga opposition party tem den senden ka ayongzüka liasü, saka party Tir, Rahul Gandhi asoba anogo asübayong iba sendenji thinen.
Ano BSP tongti, Mayawati-ia twitter ajanga, Modi-i ayongba sendenji EVM onük lemteptsü atema asübo lai senden nungji adentsü liasü, ta ashi.
Modi-i ayongba senden nung AAP tongti, Arvind Kejriwal-a maden saka party züngsem Raghav Chadha denogo, ta osang angazüker.
Mongolbar nikongdang UPA nung dena aliba party tem Parliament nung adenshia iba onük nung o lemtepba sülen maneni parnoki tanga opposition party tem dena senden ka ayongzüka amentsü lemtetogo.