Congress-DMK teloktepji temeshi masü: Irani

Chennai, May 13 (Agencies): Tanü Union HRD Minister, Smriti Irani-i Tamil Nadu nung May 16 nü Assembly election atema Congress-DMK loktepbaji temeshi masü, ta aitsüba den külemi 2G spectrum ochimashi ken o süoka jembi.
Tamil Nadu BJP Tir, Tamilisai Soundararajan atema nüboyimtsüba senden nung jembidang Smriti Irani-i, “Congress-DMK teloktepji temeshi masü, kodang iba linük nüburtemi Congress aser DMK teloktep indang jembidir, linük kanga aoksatsüba 2G ochimashi ken o imdangi arua bilemteter,” ta ashi.
Soundararajan-i Chennai nung Virugambakkam constituency nungi tokteptsü.
“Kodang asenoki Congress aser DMK teloktepji reprangdangdir, parnoki 2G ochimashi dang masü saka linük atema helicopter aliba nunga ochimashiba angutsü,” ta Union minister-i ashi.
DMK-i M Karunanidhi melenzüktsü atema nübo mangur ta aija Irani-i, “Parnok tekapu nung party maitsü atema anü adokba noksa lir. Saka kodang nenoki Tamil Nadu nungertem dang koba jabaso shimmer (Karunanidhi sülen) ta asüngdangra, parnoki, tang tashi nungbo DMK telung nunga, shiba shimtsü aser shiba tesülen yutsütsü’ar telemtetba magi ta langzütsü,” ta ashi.
Union Minister-isa, Tamil Nadu tia nung kibong ka dang tiaja lir asü (?) ta nüburtemi shisangdangtsüla, ta ashi.
Tang state sorkar tashi nung aliba party, AIADMK-i state nung angati aika lemtsüba dak sentakba nung Irani-i, kechiba iba party yagi sensotem rongsenkettsüng nung tashi meitdaktsü (?) ta pei sasa asüngdangtsüla, ta ashi.
“Külen asenok rongnung party kati (AIADMK) balala nangzüker, osettsüset angati lemtsür. Pei sasa pei nüngdak peritsüsa kechiba iba party yagi sensotem rongsenkettsüng nung tashi meitdaktsü (?) ta peisasa asüngdangtsüla,” ta Union HRD minister-i ashi.
Centre sorkari benokba scheme balala metetdaktsüdang Irani-i, Jan Dhan Yojana scheme kübok bank account lapoktsüba ajanga tiyongtsü nung inyakertem makai kümogo, ta ashi.
“Delhi nungi Congress lenir kati yamai ashi, Delhi nungi sen 1 yoker, ajisüaka sensaker ket atongdangbo poisa 10 dang akum. Mapang ka nungbo yamaji liasü,” ta lai ashi.
“Kodang Narendra Modi Ato kilonser akum, pai tiyongtsü nung inyakertemi sensakertem meyong senji magitsütsü atema aser bank account nung indangindanga senji inoktsütsü atema senso ajak bank account lapoktsü atema pai sangdonga liasü,” ta laisa ashi.