Congress-i 2019 küm election nung menden 250 nungi tokteptsü

New Delhi, Aami/June 16 (Agencies): Centre nung Narendra Modi-i aniba BJP sorkar tanaben tashii marudaktsütsü nükjidong nung Rahul Gandhi lenisüba kübok Congress party-i 2019 küm Lok Sabha election nungbo tamalen dang nungi menden tajemba nung tokteptsü; Congress-i menden 250 nungdang tokteptsü aser ibaji India nunger nüchiso anguba sülen Congress-i menden ishitiba nung tokteper asütsü, ta osang ka ajanga metetdaktsü.
BJP den madenba party tem nem menden aika lemzüktsütsü nükjidong nung Congress-i menden 250 nung ang tokteptsü, kechiyong Congress-i opposition party tem lokteptsü atema bilemdar, ta kasa osang ajanga ashi.
Rahul Gandhi-i aniba party-i 2019 Lok Sabha elections nung tanga party tem den menden lemsatsü atema asalentong yangluogo. AK Antony-i aniba committee dang 2019 küm elections atema asalentong yanglutsü mapa nungloktsüogo.
Iba committee jagi district aser state shia nung party units aser national office ketdangpurtem aser party Tir, Rahul Gandhi den asüngdangtepa asalentong yanglutsü.
Ano tanga osang ka ajanga ashiba agi, taoba Lok Sabha election nung Congress-i takok anguba menden 44 jibo tanga party tem nem magütsütsü.
Uttar Pradesh, Madhya Pradesh, Rajasthan aser Gujarat ama state tulutem nung Lok Sabha menden aika lir, anungji Congress party-i item states nung booth-level workers den asüngdangtepa asalentong yanglushitsü.
Bihar aser Uttar Pradesh na nung Congress-i RJD, BSP aser Samajwadi Party tem den tamalen lokteper toktepba mapang ajangshibatem nung ajemdaker party-i 2019 Lok Sabha election atema tanga party tem den menden lemsatsü.
Rahul Gandhi-ibo yimjak nung pa Ato kilonser kümnüba tebilemba lemsatepogo, ajisüaka tang tashi nungobo teloktep opposition party tem tsüngda iba atemaji telemtetba kecha agia mali.