Congress-i aniba opposition-i Tir candidate atema Meira Kumar shim

New Delhi, June 22 (Agencies): Opposition party tem tenüng nung Brihostibarnü Congress Party Tir, Sonia Gandhi-i, taoba mapang Lok Sabha Speaker, Meira Kumar Tir election atema opposition candidate asütsü, ta sangdongogo.
Meira Kumar ya Bihar, Arrah district nungi lir, aser la ya Dalit lenir aser taoba mapang Deputy Prime Minister, Jagjivan Ram’er jala lir.
2004 küm la Manmohan Singh-i aniba UPA sorkar cabinet nung shima Social Justice & Empowerment minister akum. Iba sülen 2009 küm la Water Resources Union Minister inyaka liasü.
Ponguben tashi MP inyakla, Kumar ya tetsür rongnung mezüngbuba Lok Sabha Speaker shima 2009 nungi 2014 küm tashi inyaka liasü. La ya lawyer ka lir.
Tanü Parliament House, New Delhi nung Sonia leniba nung opposition party tem senden ka amenba mapang party 17 nungi lenirtemi iba telemtetba agia liasü.
Tanü iba senden nung Congress tongti, Sonia den tongtibang lenirtem rongnung taoba Ato kilonser, Manmohan Singh, Congress lenirtem- Ghulam Nabi Azad, Mallikarjun Kharge aser Ahmed Patel, NCP lenir, Sharad Pawar aser RJD tongti lenir, Lalu Prasad Yadav nunger densema liasü.
Ano Left lenirtem rongnungi Sitaram Yechury aser D Raja, DMK nungi Kanimozhi aser National Conference lenir, Omar Abdullah nungera liasü.
May 26, 2017 nü opposition party tem senden nung Trinamool Congress lenir, Mamata Banerjee, BSP lenir, Mayawati aser SP lenir, Akhilesh Yadav nunger dena liasü, ajisüaka tanübo parnok iba senden nung medentet, saka parnok melen tanga lenirtem yok.
Ano iba senden nungsa JD-S, RSP, JMM, Kerala Congress, RLD, IUML aser AIUDF lenirtema dena liasü.
JD(U)-ibo BJP-i shimba Tir candidate, Ram Nath Kovind nungittsü sangdongogo.
Tir election nung opposition party tem longjemer candidate ka shimtsü atema JD(U) tongti lenir aser Bihar Chief Minister, Nitish Kumar-i ayongmesoa iba maparen tenzüka liasü, ajisüaka ajungbena yashi par party-i BJP-i shimba candidate ang pusemtsü sangdongba ajanga aika aoksadaktsüogo.