Congress-i ano tamakok angu; Party sorkar state 4 nung dang kümogo

New Delhi, December 18 (Agencies): Hombarnü Congress Party-i Gujarat aser Himachal Pradesh assembly election nung tamakok nguogo; parnoki tesüiba küm asem nung election aika nung tamakok nguyonga arudar.
2014 küm Lok Sabha elections nung Congress-i tamakok kanga mejungi ngua liasü aser iba mapang nungi tenzüka parnoki state aika nung tamakok nguyonga arudar,
1984 küm taoba mapang Ato kilonser, Indira Gandhi tepsetba sülen Congress-i Lok Sabha menden 415 tashi nung takok ngua liasü aser ibaji vote shilem 48 liasü. Iba sülen küm 30 lir 2014 küm election nung Sonia Gandhi aser Rahul Gandhi na lenisüba kübok party-i menden 44 nung dang takok ngua liasü, aser ibaji party-i tamakok tamajungtiba anguba liasü.
Tesüiba küm asem tsüngda state assembly elections nung Congress-i Punjab aser Puducherry na dak alaka state aika ka nung yimsüsütsüsa menden peria mangu.
Tanübo India kübok UT/state 29 nung Congress sorkar state pezü nung ang lir, aser itemji Karnataka, Mizoram, Meghalaya aser Punjab lir. Ano külen BJP-ibo state 14 tashi nung yimsü südar, aser state pongu nung tanga party den teloktep sorkar lir.
2014 Lok Sabha election sülen state 18 nung election agiogo aser item rongnung BJP-i state 11 nung takok angu saka Congress-ibo state ana nung dang takok angu.
Arunachal Pradesh nunga Congress-i takok ngua liasü, ajisüaka Congress MLA aikati party toktsür BJP den aden.
BJP-i Haryana, Jharkhand aser Maharashtra nung Congress sorkar atsüngdok, aser Jammu & Kashmir nung PDP den lokteper sorkar akum.
Taküm küm tetenzüklen state pongu nung election agi aser item rongnung Congress-i Punjab nung BJP-Akali teloktep madak takok angu, saka Uttarakhand, Manipur aser Goa nung tamakok angu. Goa aser Manipur na nungbo Congress party single largest party liasü ajisüaka BJP-i tangar den lokteper sorkar akum.
Tang tesüsa Congress-i Gujarat nung BJP sorkar atsüngdoktsü makok aser Himachal Pradesh nung par sorkarbo atsüngdokdaktsüogo.