Congress-i Atal Bihari Vajpayee mezüng semdang: Rahul Gandhi

New Delhi, Aami (June) 12 (Agencies): Congress-i tanga party lennirtem akhümtsübuba sobaliba lir ta sayua Congress tir Rahul Gandhi-i AIIMS nung Atal Bihari Vajpayee semdangba osang metetdaktsü.
Vajpayee tezüngjang majungba atema AIIMS nung anepaludar aser pa semdanger mezüngpur rongnung Rahul liasü.
“Congress party-i Vajpayee’er sorkar den toktep saka pa shirangdang onoki pa mezüng semdang. Iba ya Congress party indang tangatetba lir, onoki onok den toktepertema akhümtsübur” ta Mumbai nung sentong ka nung Rahul-i ashi.
“Onoki Vajpayee anema toktep saka pa shirangdang ni pa den ajuruteptsü ao kechiyong ni Congress indang sepai ka lir. Vajpayee-i linük atema inyak aser pai PM inyakba atema onoki pa akhümtsübur. Iba ya onok sobaliba lir” ta paisa shisem.
Rahul-i Hombarnü semdangba sülen tanü Prime Minister Narendra Modi aser BJP tir Amit Shah nati anir BJP lennirtem AIIMS-i ao.
Narendra Modi-i lennir tejentem sendokba atema Rahul-i pa lutsü.
Prime minister-i pa tesayur LK Advani akhüm metsübur. PM Modi-i Advani akhümtsübuba dang nungibo Congress-ia ang tuluba akhümtsübur ta paisa ashi.
“LK Advani ya PM Modi indang tesayur liasü saka PM Modi-i pa akhüm metsübur. Ni Advani atema bilemtsür. Modi dang nungibo Congress party-i ang Advani tali akhümtsübur” ta Rahul-isa shisem.
Arishi küm 93 tain Vajpayee ya 1996 küm mapang tatsüka aser 1998 nungi 2004 tashi Prime Minister inyak. Pa temang mejungi akümba ajanga politics toktsü.
Vajpayee temang tendangtsü atema aniok aser pa temang reprangba nung urinary tract infection aliba ngutet, ta AIIMS-i sangdong ka nung metetdaktsü.
Taruba assembly elections nung Congress-i BJP atsüngdoktsü aser 2019 general elections nunga tanga opposition party temi yaria Congress-i takok angutsü ta Rahul Gandhi-i tanü ashi.
“BJP-i tawa tu Karnataka nung tamakok nguogo aser Gujarat nung tera agi dang takok angu. Parnok Rajasthan, MP aser Chhatisgarh nungi atsüngdoktsü aser Congress o tanga opposition party temi 2019 General Elections nung parnok tamakok ngudaktsütsü” ta pai metetdaktsü.
Prime Minister Narendra Modi-i küm nung mapa crore 2 agütsütsü ta nangzükba meinyak. 2014 general elections mapang BJP-i aniba sorkari lanur nem küm shia mapa crore 2 agütsütsü ta nangzük, ta Rahul-isa ashi.