Congress-i by-election magizüker

Kohima, June 9 (TYO): Nagaland Pradesh Congress Committee (NPCC)-i state nung by-elections magitsüla ta sangdong ka ajanga metetdaktsüogo.
Taküm May 24, 2017 nü State Lotteries & Music Task Force Parliamentary Secretary, Khriehu Liezietsu-i tebu aser tang teinyakdak Chief Minister Dr. Shurhozelie Liezietsu nem lenmang lapokja pa menden nungi anena liasü.
Khriehu ya Northern Angami-I Assembly Constituency nungi MLA liasü aser iba constituency nung by-election agia Dr. Shurhozelie-i State Assembly nung züngsem akümtsü atema menden toktsü.
Yashi AICC Legal Secretary den asüngdangya asüba sülen Election Commission of India (ECI) dangi shidi ka züluogo, ta NPCC Media Cell-i sangdong ka nung metetdaktsü.
Representation of the People Act of 1951 nung Arrla 151-A nung shia aliba agi, inyaktsü kümsük nung küm ka majung dang lira, by-election agitsü nüngdak madoker. Nagaland Legislative Assembly indang kümsükji March 12, 2018 nung tembangtsü aser aji ita 8 dang anünga lir, ta NPCC-isa ashi.
India nung Presidential Election July mesüra August nung agitsü lir, aser Nagaland nung by-election ji iba sülen ang agira aser ano State General Election atema code of conduct ji taküm December tatemlen nungi tenzükra, sorkar mapa inyaktsü atema ita pezü jungnüa dang adoktsü. Maneni, Constitutional maparen inyaktsü atema anogo ka session dang agitettsü. Anungji nung opposition teloktem atema by-election ji nüngdak madoker, ta NPCC-isa shidi nung metetdaktsüogo.
Deputy Election Commissioner, Umesh Sinha-i iba onük ya ECI den benoka olemteptsü ta shiogo, ta parnokisa shisem.