Congress-i CAB anema three-line whip agütsü

Guwahati, January 31 (Agencies): Rajya Sabha nung Citizenship (Amendment) Bill, 2016 anema vote agütsütsü atema Opposition Congress-i three-line whip agütsütsü lemtetogo.
Assam asoshi Congress incharge Harish Rawat-i iba osang tanü metetdaktsü.
Rajya Sabha nung Citizenship (Amendment) Bill 2016 magizükdaktsütsü atema iba telemtetba ya tematiba jenjang nung lemtet, ta pai ashi.
Tawa tu Rawat-i Assam PCC president Ripun Bora aser Assam legislative Assembly nung Leader of the Opposition Debabrata Saikia dena Assam nung Congress lennirtem den ajurutepa CAB indang tebilemtsü lemsatep.
Iba sülen pai AICC ketdangpurtem den iba osang lemsatep.
Rajya Sabha nung Bill benokba mapang Congress-i vote agütsüba maparen nung medeni senden nung madentsü akok ta Janata Dal (United)-i arentaka bilemba olen ka ashiba sülen tanü Rawat-i CAB anema vote agütsütsü lemtetba osang metetdaktsüogo.
January 8 nü Lok Sabha nung bill benoka agizükba mapang Congress-i senden nung medeni kimai alu.
Tawa tu JD (U) party secretary general KC Tyagi dena JD(U), Vice President Prasant Kishore aser Northeast India General secretary in charge Afaque Ahmad Khan nungertemi Asom Gana Parishad (AGP) lennirtem den ajurutepa bill atema jembia liasü.