Congress-i centre nem Manipur ken o mejembidaktsüner

Imphal, January 12 : Manipur nung Inner Line Permit amshitsü asoshi state assembly nung latetter yua lir saka iba ken o nung center nungi teshimtet purtem yoka jembishitsübaji magizüktettsü ta Congress lenir aser yimsüsür R.K.Anand-i tanü Mongolbar nü yangi Imphal nung metetdaktsü.
Anand ya ken o tasak ajak jembizüka yokba Chief minister den inyakba nisung ka lir, aser pa ya ILP atema nokdakertem den mapang talangka agia jembia aruba nisung ka lir.
Paisa ashiba agi, Manipur nung bendangertem arutsü aser alitsü atema ozüng latetba nung aketba onük (bills) asemji Manipur nungi adokba MP aser MLA-tem rongnung jungjunga jembiteper külen August 31 nü Manipur Assembly nung latet.
” Ajisüaka, item ken o tem ya ano ken center nungi yokba nisungtem den jembishitsüsa aküm nungbo, iba jagi nübortem nem tangatetba tai ka agütsür asütsü, anungji ibajibo magizüktettsü ta Chief minister Okram Ibobi-i ashiba o ka metetdaktsü.
Iba kasa ken o nung mangatettep adoka Churachandpur district nung yaküm police-i lanur tuku khaset. Item tasümangji tang tashi mozü kidang tasümang ayudak yua lir kechiyong tamasa ‘anti-tribals bills” lateta akabaji agientsüla ta tribal-temi akanger. Iba tatalokbaji bilemteta, tawa Delhi nung kaketshirtemi tasümang süngden bener longkak aita jajabaji tim masü, iba jagi Manipur nungbo ‘tribal’ tem mezüngshir amai bilemtsü ta Congress lenirisa ashi.
Manipur assembly nung latetba onükji ozüng küma inyaktsü asoshi tebilemdangtsü aika alinungji Manipur sorkari latetba onüktemji angh ajanga linük tir dangi yokogo.
Anand-isa ashiba agi, Manipur nung tribal masürtem asoshibo temeten ozüng kecha balaka mali aser parnokji tesamatsü ana nung lir.
Iba ama ken o telatetba kati marutet anogotem süitema aoba agi, ano yakta ILP atema ola adoka inyaktsü ta Inner Line Permit System Joint Committee nung Convener, Ratan Khomdrami metetdaktsü.
Item onüktem nung hai haura kaa latettsü asoshi January 3 nü tashi mapang agüja liasü saka January 4 nü menoknok anokba lendong ajanga ILP onük nung ola adoktsü asoshi anogo memetetdaktsüi atar ta paisa ashi.
Tang tashi nung Manipur nung ILP aginür aser maginür na ajurutepa tajung ka jembitsüsa lenjem maka, anungji kin o kin na tsüngda rara adoktsü ana nung dang lir.
Taoba ita nung tribal nisungtem den amendang, Chief Minister Ibobi-i ILP dak sendakba ken o ya telok ajaki mulungba nung latettsü merangtsü ta shia liasü.
Chief minister-isa ashiba agi, ILP ozüng latetbaji tribal anema masü saka onük kar danga yanglushitsü nüngdakra ano yanglushitsü asoshi sorkari mulunga dang lir.
Deputy Chief Minister Gaikhangam-i ashiba agi, mangatetba nisung kari nübortem nem tangatetba tai agüja mashileni anir ta metetdaktsü.
Manipur nung lenden nung alir Manipur nungertemi ILP aginür saka tenem nung alirtemi ILP maginür.
Iba jagi tribal-temi ILP bills-ji yaktasa agienang ta akanger aser tribal masüba nübortem jagi yaktasa ILP onüktem ya mapa küma menshitsüla ta akanger.

You must be logged in to post a comment Login