Congress-i Gopinath Bordoloi & Bhupen Hazarika nem tetushi magütsü: Himanta Sarma

Dhing, March 31 (Agencies): Congress-i nüngtugu kentener Bhupen Hazarika aser Assam nung mezüngbuba Chief Minister Gopinath Bordoloi na nem civilian award tematiba magütsüba atema Assam Finance Minister Himanta Biswa Sarma-i aitsü.
Prime Minister Narendra Modi lenisüba kübok Bharatiya Janata Party (BJP)-i Assam len tasen ka nung anir. Congress-i taoba Prime Minister Jawaharlal Nehru aser Rajiv Gandhi nunger nem civilian award tematiba agütsü saka tia maka parnoki kasa sempetji Gopinath Bordoloi aser Bhupen Hazarika na nembo magütsü” ta Sarma-i ashi.
Nagaon kübok Jajori nung lokti sentong ka nung jembidang Sarma-i “Nübortemi kibong sasep nung politics asoshi vote magütsütsü. Nenoki Mahanta nem vote agütsüra Narendra Modi-i kümsük tanabuba atema Prime Minister inyaktsü” ta metetdaktsü.
Kaliabor parliamentary constituency nungi of Asom Gana Parishad (AGP) candidate Moni Madhab Mahanta atema Sarma-i nüboyimtsü.
“Taoba Indian Prime Minister Manmohan Singh mapang asenoki rail-cum-road talangtiba Bogibeel bridge aser road bridge talangtiba Dhola Sadiya bridge tembanga yanglunüa liasü, saka apu anaprongla Narendra Modi lenisüba kübok tembanga yangluogo” ta paisa shisem.
“Manmohan Singh-i Assamese nunger konang ‘gamosa’ akhümmetsübur. Narendra Modi-i dang gamosa akhümtsübur” ta Sarma-isa ashi.
Sarma ya North East Democratic Front (NEDA) indang convener lir aser paisa ashiba agi Congress-i kiralongraba anema inyaktsü tasü maiter saka Narendra Modi-i aniba Centre sorkari Pakistan nem telangzüba tajung agütsü.