Congress-i GST tenzükba sentong nung madentsü lemtet

New Delhi, June 29 (Agencies): June 30, 2017 ayaterm nung Parliament nung Goods and Services Tax (GST) tenzükba sentong nung madentsü atema Brihostibarnü Congress party-i telemtetba agiogo.
Congress Tir Sonia Gandhi aser taoba Ato kilonser, Manmohan Singh na senden amenba sülen tanü Congress lenir, Satyavrat Chaturvedi-i, ”June 30 ayaterm nung Parliament House nung ayongba GST sentong nung madentsü Congress-i lemtetogo,” ta metetdaktsü.
Osang ajanga ashiba agi, iba senden nung adentsü asü madentsüar, iba atemaji Congress-i telung nung tanga party tem dena o lemtepa liasü.
Tamalen Congress-i, Parliament House nung ayaterm nung ayongba senden nung Ato kilonser, Narendra Modi-i GST tenzüktsütsüji tim masü, kechiyong iba sentong nung linük Tir, Pranab Mukherjee-a densema alitsü, ta aija liasü.
“Tir ka matsüngdang kodaser Ato kilonseri ang GST tenzüktsü? Yamaji inyaka maru aser ibaji agizüktetla ka masü,” ta Congress lenir, Randeep Surjewala-i ashi.
Ano külen West Bengal Chief Minister Mamata Banerjee-ia, GST ya Centre-i aibelen inyakba tulu rongnung ka lir, ta aitsüogo.
Mamata-i aniba Trinamool Congress (TMC) sorkari tamasabo GST ya pusema liasü, saka par assembly nung iba ya magizüktsü lemtetogo.
Mamata-i, Parliament nung GST tenzükba sentong nung lar party madentsü, ta yashi sangdongogo.
Ano GST atema Nationalist Congress Party, Bahujan Samaj Party, Samajwadi Party aser Rashtriya Janata Dal ama opposition party temia tanü peipei sasep nung party lenirtem senden ayonga menogo.
June 30 ayaterm nung GST tenzükba sentong ya circular-shaped Central Hall nung akatsü. Iba tesem nungsa linük nüjiso ngur küm 50 ajungba sentong-a kaa liasü.
GST tenzükba sentong nung Tir, Pranab Mukherjee, Ato kilonser, Narendra Modi, Union Finance Minister, Arun Jaitley nunger den minister tem aser tongtibang ketdangsertem aika adentsü.
June 30 aonung 11:00 ako meta GST sentong tenzüktsü aser iba sentongji 12:30 ako shi nung tembangtsü.