Congress-i Gujarat election atema CM candidate mesangdongtsü

New Delhi, August 28 (Agencies): Sangküm Uttar Pradesh Assembly election atema Congress-i chief minister candidate atema taoba mapang Delhi chief minister, Sheila Dikshit shimogo, ajisüaka party-i Gujarat election atemabo chief minister candidate mesangdongtsü.
Congress lenir kati, Gujarat nung party lenirtem ka küma longjemer tokteptsü atema Gujarat asoshibo chief minister candidate meshimtsü, ta ashi.
1989 küm nungi tenzüka Congress-i Gujarat election nung takok mengui arur. Ato kilonser, Narendra Modi’er state ya BJP atema Hindutva laboratory lir, ta züngshir.
Gujarat nung opposition lenir aser taoba mapang Chief minister, Shankersinh Vaghela densema state nung Congress lenir aikati chief minister menden arishir.
PCC tongti, Bharatsinh Solanki ya taoba mapang Union Minister aser taoba mapang Chief Minister, Madhavsinh Solanki’er jabaso lir aser pai-a iba menden aginer.
Maneni AICC otongdar aser taoba mapang state assembly nung opposition lenir,  Shaktisinh Gohil-ia iba menden aginer.
Gujarat atema Chief minister candidate shimra party nung telemsa adoktsü tsübuba ajanga party-i CM candidate meshimtsü lemtet, ta osang angazüker.