Congress-i Indira Gandhi aser Rajiv Gandhi na pusemer

New Delhi, August 10 (Agencies): Tawa Prime Minister Narendra Modi-i Nagaland atema yimjung tenangzüktep agiba nung tashishitsü keta lir ta Congress-i ashiba sülen BJP-i taoba Prime Minister tem – Indira Gandhi aser Rajiv Gandhi na lutsü, aser iba atema Deobarnü Congress-i BJP aitsüogo.
Indira Gandhi aser Rajiv Gandhi nati Meghalaya aser Punjab nung yimjung tenangzüktep agiba inyakyim nung BJP-i tena aitsü.
August 3 nü NSCN-IM aser Centre sorkar tsüngda Naga yimjung tenangzüktep agi aser iba ajanga 1997 nungi NSCN-IM-i Centre den ceasefire tenangzüktep agir olemtepyonga aruba mapa tatembanglen kati arur ama ajiteter.
Naga yimjung tenangzüktep ya otsüsütsü mapa ka lir ta Prime Minister-i ashi saka Congress-i ashiba agi, iba tenangzüktep ya Union Home Minister Rajnath Singh-i memetet liasü aser ano north east state asem – Assam, Arunachal Pradesh aser Manipur nungi chief minister tem den asüngdangya kecha maliasü.
Iba onük nung ajemdaker BJP-i 1975 aser 1985 nung Indira Gandhi and Rajiv Gandhi nati chief minister tem majangi dang Shillong aser Punjab yimjung tenangzüktep agi ta aitsü.
“Taoba Angh LP Singh Interlocutor ka ama Shillong tenangzüktep agi aser iba mapang taoba Prime Minister Indira Gandhi-i North-east nung chief minister ka den danga osang melemsatep. Ano taoba Prime Minister Manmohan Singh-i Teesta tenangzüktep atema jembi aser West Bengal Chief Minister Mamata Banerjee medeni pa Bangladesh-i ao” ta Union Minister, Nirmala Sitharaman-i ashi.
Ajisüaka, Congress-i ashiba agi BJP-i tesüiba otsütem tiyazü belensatsü meranger. “Iba ya khenyongi tiyazü. Indira Gandhi-i chief minister tem dang nungi tebilemba asüngdang aser itemji yimjak nung metetdaktsü. Rajiv Gandhi-ia chief minister den asüngdangyaba sülen ang Punjab tenangzüktep agi” ta Congress otongdar, Abhishek Manu Singhvi-i ashi.
Naga yimjung tenangzüktep nung North-east state asem nungi chief minister tem asüngdangya masüba atema Singhvi-isa ashiba agi, “Asen linük temzüng nung asüngdangya asütsü lateta lir.”
Hokolbarnü Modi-i Manipur Chief Minister Okram Ibobi Singh dang asüngdangyatsü ta shiogo aser iba jagi Centre sorkari mezüng nung pa den asüngdangya masüba kuli sayur, ta Congress otongdarisa shisem.